Ministr abarony Brytanii ŭłasnaručna pravieryŭ tanki, na jakich vučacca vajavać ukraincy FOTA
Ministr abarony Brytanii Ben Uoles naviedaŭ bazu Bovinhtan-Kiemp, dzie ŭkrainskija tankisty vučacca vajavać na brytanskich tankach Challenger 2, partyju jakich Łondan abiacaŭ pieradać Uzbrojenym siłam Ukrainy. Jon sam prainśpiektavaŭ hetyja tanki.
Fota: Ben Birchall / Pool via AP
Urad Brytanii pačaŭ pastupova «razahravać» vajennuju pramysłovaść krainy, u pryvatnaści, vytvorčaść snaradaŭ, kab dapamahać Ukrainie i papaŭniać ułasnyja zapasy. Pra heta skazaŭ ahienctvu Reuters ministr abarony.
«My zaklučyli kantrakty z našymi vytvorcami bojeprypasaŭ i ŭžo pačali atrymlivać pieršyja partyi i dla papaŭnieńnia našych zapasaŭ, i dla Ukrainy», — skazaŭ Ben Uoles, adkazvajučy na pytańnie pra toje, ci moža Brytanija vyrablać bojeprypasy ŭ dastatkovaj kolkaści.
Fota: Ben Birchall / Pool via AP
Pa słovach Uolesa, ciapier i Brytanija, i inšyja zachodnija krainy vyrašajuć, jak stymulavać svaju vajennuju pramysłovaść.
«Viedajecie, raniej my siadzieli na svaich zapasach [bojeprypasaŭ], zdymali ź ich pył, dumali: ci budzie heta [spatrebiacca jany] kali-niebudź? A ciapier u nas — našmat bolš ahresiŭnaja i niebiaśpiečnaja Rasija na krai Jeŭropy, i heta prymusiła ŭsich zasiarodzicca», — skazaŭ Uoles.
Ministr paćvierdziŭ, što 14 abiacanych tankaŭ Challenger 2 Ukraina atrymaje hetaj viasnoj, a zatym Brytanija, vierahodna, zmoža dać ukraincam jašče niekalki tankaŭ.
«Rasija prymianiaje taktyku miasarubki. Razumiejecie, rasijskaja armija nie bieraže ludziej, jana kidaje ich u miasarubku. I, bajusia, u hetym hodzie nam pryjdziecca pakłapacicca pra toje, kab hetaja taktyka nie akazałasia paśpiachovaj», — skazaŭ Ben Uoles.