Mozh moža sastareć na adzin-dva hady za adnu biassonnuju noč — daśledavańnie
Ale pry hetym jość mahčymaść adkrucić źmieny nazad.
Niedasypańnie vyklikaje stareńnie mozha
Navukoŭcy vyjavili, što čałaviečy mozh moža sastareć na 1—2 hady ŭsiaho tolki za adnu biassonnuju noč. Hetaja vysnova vyciakaje z daśledavańnia, jakoje 20 lutaha było apublikavana ŭ navukovym časopisie JNeurosci (The Journal of Neuroscience).
Daśledčyki praviali nazirańni nad 134 ludźmi, pazbaviŭšy bolšuju častku ź ich snu i padzialiŭšy ich na niekalki hrup pa roznych uzroŭniach niedasypańnia:
- poŭnaje niedasypańnie (adsutnaść snu na praciahu adnoj nočy),
- častkovaje niedasypańnie (try hadziny snu za adnu noč),
- chraničnaje niedasypańnie (5 hadzin snu na praciahu 5 načej),
- narmalny stan (8 hadzin snu kožnuju noč).
Pry hetym dla ŭsich hrup ekśpierymient pačynaŭsia z adnoj nočy zdarovaha snu (minimum 8 hadzin), a dla troch pieršych hrup jon zakančvaŭsia jašče adnym adnaŭlenčym snom.
«Navukoŭcy kožnuju noč ekśpierymienta praviarali stan mozha ŭ ludziej pry dapamozie aparata MRT i mašynnaha ałharytmu brainageR, jaki ŭmieje vyznačać uzrost čałaviečaha mozha ź nievialikaj chibnaściu».
«Padčas nazirańniaŭ vyśvietliłasia, što ŭ hrupy, jakaja nie spała adnu noč, brainageR vyjaviŭ stareńnie mozha ŭ siarednim na 1—2 hady ŭ paraŭnańni z papiarednimi pakazčykami da ekśpierymienta. Pry hetym hrupy z častkovym abo chraničnym niedasypańniem nie mieli nijakich istotnych adroźnieńniaŭ ad pačatkovaha stanu», — havorycca ŭ daśledavańni.
Adnak, pa słovach navukoŭcaŭ, dla źniknieńnia padobnaha efiektu i adnaŭleńnia mozha nieabchodna dobra vyspacca na nastupnuju noč paśla adsutnaści snu ŭ papiaredniaj.
«Jość dokazy taho, što ŭ mozhu ludziej, pazbaŭlenych snu, adbyvajecca niekalki typaŭ transfarmacyj, u tym liku źmieny abjomu šeraha rečyva i raźmierkavańni mazhavoj vadkaści. Pry hetym padobnyja źmieny možna adkrucić — dastatkova tolki dobra vyspacca na nastupnuju noč», — adznačajuć daśledčyki.
Taksama jany zajaŭlajuć, što hetaje daśledavańnie aśviatlaje tolki nastupstvy adnoj biassonnaj nočy. Da hetaha času nieviadoma, što adbyvajecca z čałaviečym mozham pry chraničnym ci častkovym niedasypańni ŭ realnym žyćci, kali padobny stan doŭžycca miesiacami i navat hadami, a nie niekalkich dzion u ramkach ekśpierymienta.
Čytać jašče:
Try mietady pieramahčy infarmacyjnuju pierahruzku ŭ śviecie, poŭnym rekłamy i škodnaj infarmacyi
Jak prajści pradvieśnie biez apatyi?
Cykličnaje dychańnie: usiaho piać chvilin na dzień zdymajuć stres