U Šviecyi nie vyklučajuć napadu Rasii
U parłamienckim dakładzie, jaki pavinien być apublikavany ŭ paniadziełak, adznačajecca, što choć rasijskija suchaputnyja vojski znachodziacca va Ukrainie, nielha vyklučać napadu na Šviecyju.
Fota: David Keaton / AP
Kamitet abarony parłamienta Šviecyi dapuskaje, što Rasija moža ździejśnić vajskovy napad na krainu. Pra heta havorycca ŭ spravazdačy kamiteta, jak paviedamlaje «Jeŭrapiejskaja praŭda» sa spasyłkaj na šviedski telekanał SVT.
U parłamienckim dakładzie, jaki pavinien być apublikavany ŭ paniadziełak, adznačajecca, što choć rasijskija suchaputnyja vojski znachodziacca va Ukrainie, nielha vyklučać napadu na Šviecyju.
«Rasija taksama jašče bolš źniziła paroh prymianieńnia vajskovaj siły i demanstruje vysokuju schilnaść da palityčnych i vajennych ryzyk. Zdolnaść Rasii pravodzić apieracyi z vykarystańniem Vajenna-pavietranych sił, Vajenna-marskich sił, zbroi dalokaha radyusu dziejańnia abo jadziernaj zbroi suprać Šviecyi zastajecca niaźmiennaj», — havorycca ŭ dakumiencie.
Pa danych telekanała, u dakładzie tłumačycca novaja abaronnaja daktryna Šviecyi, u asnovie jakoj lažyć siabroŭstva ŭ NATO, u adroźnieńnie ad papiaredniaj daktryny, jakaja abapirałasia na supracoŭnictva ź inšymi paŭnočnymi krainami i ES.
Šviecyja sprabuje ŭmacavać svaju abaronu i padała zajaŭku na ŭstupleńnie ŭ NATO ŭ 2022 hodzie paśla pačatku poŭnamaštabnaha ŭvarvańnia Rasii va Ukrainu.
Pakul tolki Turcyja i Vienhryja nie ratyfikavali zajaŭku na ŭstupleńnie Šviecyi ŭ aljans.
Hienieralny sakratar Paŭnočnaatłantyčnaha aljansu Jens Stołtenbierh raniej čarhovy raz zajaviŭ, što Šviecyja vykanała ŭsie patrabavańni dla ŭstupleńnia ŭ NATO, i vykazaŭ nadzieju, što heta adbudziecca da samitu ŭ Vilni.