Sudzili rajonnaha čynoŭnika, jakoha niadaŭna pa telefonie adčytvaŭ kanał «Rudabielskaja pakazucha»
Kiraŭnika spraŭ Šumilinskaha rajvykankama Siarhieja Biełahałova sudzili za słužbovuju chałatnaść. Dva miesiacy tamu jamu telefanavała błohierka Volha Pavuk, kab spytać pra ekanamičny stan rajona i toje, adkul tam uzialisia stratnyja kałhasy.
Padčas razmovy z kiraŭnikom spraŭ Šumilinskaha rajvykankama Siarhiejem Biełahałovym. Skryn videa kanała «Rudabielskaja Pakazucha»
Siarhieja Biełahałova sudzili siońnia pavodle art. 428 č.2 (Słužbovaja chałatnaść). Pra sudovaje pasiedžańnie paviedamiŭ telehram-kanał «Vitiebsk, ja hulaju!».
Padčas razmovy, jakuju apublikavali ŭ pačatku červienia na jutub-kanale «Rudabielskaja Pakazucha», błohierka Volha Pavuk raspytvała kiraŭnika spraŭ Šumilinskaha rajvykankama, čamu ŭ adnym z kałhasaŭ bankructva, u toj čas, jak Ministerstva sielskaj haspadarki śćviardžaje, što stratnych haspadarak niama, kolki tracicca na absłuhoŭvańnie aŭtamabilnaha parku rajvykankama. Ale čynoŭnik unikaŭ adkaza.
Kali Volha spytałasia, navošta patrebna jaho pasada ŭ rajvykankamie, jak jana palapšaje žyćcio ludziej u rajonie, čynoŭnik adkazaŭ: «Kali vy ličycie, što dadzienaja pasada niedarečna, to ŭnoście prapanovy».
— Kolki Šumilinski rajon atrymlivaje datacyj? — pytałasia Volha Pavuk
— Šumilinski rajon datavany na 58 pracentaŭ.
— Tak vy navat napałovu siabie nie kormicie. Jaki tołk ad vašaj pracy, kali vy na 58% datacyjnyja? U vas karova 1,3 litra małaka ŭ dzień daje.
— 8,2. Voś ja pahladzieŭ apošniuju infarmacyju. A nie, heta kaniec krasavika.
— Tak kali dobryja nadoi, čamu tady bankructva?
— A z-za čaho bankructvy ŭźnikajuć u haspadarcy?
— Tak vy mnie pra heta raskažycie.
— Ja nie kiruju sielskaj haspadarkaj, ale na palcach mahu raspavieści. Kali siamja pačynaje tracić bolej, čym jana zarablaje, jana ŭ kancy kancoŭ sydzie ŭ bankruta i budzie šukać sponsara.
— A adkul Šumilinski rajon biare srodki? Dzie vy znajšli sponsara?
— Z respublikanskaha i abłasnoha biudžetu. Jość rajony, jakija zarablajuć i na siabie, i na susieda.
— Jakija ŭ Šumilinskaha rajona pieraškody, kab zarablać i davać susiedu?
— Ekanamičnaje raźvićcio Šumilinskaha rajonu voś takoje, jakoje jość. Sielskaja haspadarka ŭ tym vyhladzie, u jakim jana jość.
— Tak što rabiła ŭłada ŭsie hetyja hady ŭ Šumilinskim rajonie?
— Źmienšyli datacyju z 70 da 58%.
— I ź jakoha hoda było 70?
— Chiba što z momantu ŭtvareńnia rajona, z 1932 hoda.
— Tak kolki ž vam jašče spatrebicca hadoŭ, kab vyjści na samaakupnaść?
— Usio budzie zaležyć ad pracy ludziej u kožnaj śfiery.
— Tak dzie ŭ vas słabaje źviano?
— A vy ŭsio viedziacie da taho, što słabaje źviano heta rajonnaja ŭłada?
Adnosna bankructva kałhasu čynoŭnik zaŭvažyŭ, što jano — adzin z sposabaŭ palapšeńnia ekanomiki dadzienaj haspadarki. Jon pryvioŭ prykład, jak dva hady nazad u rajonie abankrucili kałhas, a zatym dałučyli jaho da susiedniaha. U vyniku, pa słovach Biełahałovaha, «ludzi atrymlivajuć dastojny zarobak».
Čytajcie jašče:
«Rudabielskuju pakazuchu» pryznali ekstremisckim farmiravańniem