Jeŭrasajuz pastaviŭ Ukrainie 200 tysiač bojeprypasaŭ i dźvie tysiačy rakiet. Abiacali miljon
Krainy Jeŭrasajuza ŭžo pastavili Ukrainie bolš za 200 tysiač artyleryjskich bojeprypasaŭ i bolš za dźvie tysiačy rakiet roznych typaŭ. Pra heta ŭ razmovie z ahienctvam France Presse paviedamiŭ aficyjny pradstaŭnik ES Pieter Stana, paviedamlaje «Radyjo Svaboda».
U pačatku 2023 hoda Jeŭrasajuz uzhadniŭ płan pastavak bojeprypasaŭ Ukrainie na sumu dva miljardy jeŭra. Pakiet dapamohi praduhledžvaje jak niepasrednaje zabieśpiačeńnie ŭkrainskich vojskaŭ z najaŭnych u jeŭrapiejskich krain zapasaŭ, tak i zamovy na vytvorčaść novych bojeprypasaŭ. Meta płana — na praciahu hoda zabiaśpiečyć Ukrainu miljonam snaradaŭ. Takim čynam, Ukraina atrymała piatuju častku abiacanaha ES miljona snaradaŭ.
U adpaviednaści ź pieršym etapam płana, jaki dziejničaŭ ź lutaha da kanca maja, byŭ vydatkavany adzin miljard jeŭra dla apłaty krainam ES prykładna pałovy koštu snaradaŭ, pastaŭlenych ź ich arsienałaŭ. Pry hetym ažyćciavić pastaŭki ŭ praduhledžanym abjomie nie ŭdałosia, adznačaje France Press.
Pavodle źviestak ES, krainy, jakija ŭ jaho ŭvachodziać, z pačatku vajny Rasii suprać Ukrainy pieradali Kijevu vajskova-techničnuju dapamohu na sumu 20 miljardaŭ jeŭra. ZŠA pa stanie na kaniec lipienia vydzielili Ukrainie kala 44 miljardaŭ dalaraŭ.
Čytajcie taksama:
USU vykarystoŭvajuć na froncie bojeprypasy z KNDR — ŚMI
ZŠA paćvierdzili, što pieradaduć Ukrainie kasietnyja bojeprypasy