Słovy premjera Polščy pra ŭzbrajeńnie byli interpretavanyja «najhoršym čynam» — Duda
Prezident Polščy Andžej Duda zajaviŭ, što niadaŭnija słovy premjer-ministra Matevuša Maravieckaha byli «interpretavanyja najhoršym čynam». Napiaredadni kiraŭnik polskaha ŭrada skazaŭ, što kraina bolš nie budzie pieradavać zbroju Ukrainie, bo sama aktyŭna ŭzbrojvajecca.
Andžej Duda. Fota: Paul Ellis -Pool / Getty Images
Pavodle Dudy, zajava Maravieckaha tyčyłasia tolki novaha ŭzbrajeńnia, jakoje ciapier zakuplajecca dla polskaha vojska z metaj jahonaj madernizacyi. I jon sam dumaje hetak ža sama:
«My abodva prytrymlivajemsia adnolkavaj pazicyi. My nie možam pieradać naša novaje ŭzbrajeńnie, jakoje my ciapier zakuplajem na miljardy dalaraŭ dla polskaha vojska, kab umacavać jaho, umacavać biaśpieku Polščy, kamuści inšamu. Nikomu», — zajaviŭ polski prezident.
Takaja pazicyja tyčycca «pieradačy novaha ŭzbrajeńnia, jakoje my ciapier atrymlivajem z Paŭdniovaj Karei ci ZŠA, naprykład, novych «Abramsaŭ», kamplektaŭ Patriot abo HIMARS», padkreśliŭ Duda.
Ale tyja abaviazki, adnosna jakich z Ukrainaj padpisanyja kantrakty, Polšča maje namier vykanać.
«Pa miery atrymańnia novaha ŭzbrajeńnia z Karei, z ZŠA my taksama budziem pamianšać zapasy taho ŭzbrajeńnia, jakoje siońnia znachodzicca na składach», — skazaŭ Duda.
Pavodle Dudy, technika, jakaja vyvodzicca sa składu polskaha vojska, akurat i budzie pieradavacca Ukrainie, jak «heta rabili dahetul, pieradajučy postsavieckija ŭzbrajeńni».
Čytajcie taksama:
U Polščy skandał: pa płanie abarony 2011 hoda armija mieła adstupić na liniju Visły
Prezident Polščy raskazaŭ, što pavinien zrabić Minsk dla palapšeńnia adnosin z Varšavaj
Niezaležnyja Ukraina i Biełaruś nadzvyčaj važnyja dla niezaležnaj Polščy — Andžej Duda