Chočuć pavysić padatak na pieršuju kvateru i aŭtamabili, pavialičyć nahruzku na IP. Jakija źmieny rychtujuć u Padatkovy kodeks
Pahladzieli, jakija źmieny ŭ padatkaabkładańni mohuć čakać nas z 1 studzienia 2024 hoda. Prajekt źmienaŭ u Padatkovy kodeks apublikavali na Nacyjanalnym pravavym partale.
Fota: Contributor Getty Images
Padatak za pieršuju kvateru
Z nastupnaha hoda ŭłady płanujuć pavysić pamier raźlikovaha koštu adnaho kvadratnaha mietra typavoha kapitalnaha budynka — heta ŭ svaju čarhu pryviadzie da rostu padatkovych stavak za pieršuju kvateru.
Pamier padatku składaje 0,1% ad koštu adnaho kvadratnaha mietra.
Dla Minska raźlikovy košt budzie składać 968 rubloŭ zamiest 900 ciapierašnich.
Vynikaje, što zamiest 45 rubloŭ za staličnuju dvuchpakajoŭku płoščaj 50 «kvadrataŭ» daviadziecca zapłacić 48,4 rubla.
Za kvateru takoj ža płoščy ŭ abłasnych centrach i Minskim rajonie padatak musić vyraści z 37 rubloŭ 50 kapiejek da 40 rubloŭ 30 kapiejek.
Padatak za pieršuju kvateru ŭ Biełarusi pačali spahaniać z 2022 hoda.
Padatak za darohi
Zakonaprajekt taksama praduhledžvaje novyja staŭki transpartnaha padatku.
Jaho pamier zaležyć ad vahi aŭtamabila i formy ŭłasnaści. Dla fizičnych asob za lehkavy aŭtamabil pryrost padatku moža skłaści ad 5 da 17 rubloŭ.
Naprykład, za aŭtamabil vahoj nie bolš za 1,5 tony z nastupnaha hoda daviadziecca zapłacić 66 rubloŭ zamiest 61 ciapier. Za aŭtamabil vahoj ad 1,75 tony da 2 ton — 110 rubloŭ zamiest 102 ciapier, a kali ahulnaja dapuścimaja vaha aŭtamabila bolšaja za 3 tony, to padatak naleta vyraście z 223 da 240 rubloŭ.
Staŭki za hruzavyja aŭto, jakija va ŭłasnaści fizičnych asob, vyrastuć na 12-38 rubloŭ u zaležnaści ad vahi transpartnaha srodku.
Za hruzavy i hruzapasažyrski aŭtamabil z dazvolenaj maksimalnaj masaj da 2,5 ton padatak budzie składać 174 rubli, ad 2,5 da 3,5 ton — užo 371 rubiel.
Transpartny padatak za matacykł i pryčep ahulnaj vahoj da 750 kiłahram płanujuć pavialičyć na 3 rubli — da 44 rubloŭ.
Padatki dla IP
Z nastupnaha hoda čarhovy raz chočuć pavysić staŭki adzinaha padatku dla indyvidualnych pradprymalnikaŭ.
Tak, staličnym pradprymalnikam, jakija akazvajuć pasłuhi ramontu pradmietaŭ asabistaha karystańnia i bytavych vyrabaŭ, płanujuć pavialičyć staŭku adzinaha padatku z 612 da 658 rubloŭ. Pradprymalniki z abłasnych centraŭ i Minskaha rajona pry ŭchvaleńni zakonaprajekta buduć vymušany płacić 456 rubloŭ zamiest 424.
Adziny padatak dla IP, jakija zdajuć žytło ŭ karotkaterminovuju arendu, padymuć z 620 da 667 rubloŭ dla Minska, z 578 da 621 rubloŭ dla IP z abłasnych centraŭ i Minskaha rajona.
Z poŭnym śpisam źmien i novymi staŭkami padatkaŭ, jakija płanujuć uvieści z nastupnaha hoda, možna aznajomicca pa spasyłcy. Zakonaprajekt jašče nie razhladaŭsia Pałataj pradstaŭnikoŭ i nie zaćvierdžany.
Čytajcie taksama:
Płanavyja pravierki arhanizacyj. Da kaho zavitajuć z pravierkaj užo ŭ kastryčniku
Biełaruskim IP ułady pastupova ŭskładniajuć žyćcio. A na jakich umovach pracujuć pradprymalniki ŭ Polščy i Litvie?