«Zakryjem hetuju temu». Muzyčny pradziusier z Ukrainy padčas vajny praciahvaje pracavać na BT razam z Buzavaj i Pryhožynym
Były muzyčny pradziusier ukrainskaha «X-faktara» pracuje ŭ šou «Faktar.baj» na BT, choć dapamahaŭ ładzić kancerty na karyść Ukrainy.
Muzyčny pradziusier «Faktor.BY» Mikałaj Sosin razam z Volhaj Buzavaj i Andrejem Panisavym (fota źleva), a taksama razam z Manacikam (fota sprava). Kałaž: foty Sosina ŭ instahram
Viadoŭcy jutub-šou «O(b)suždajem» zaŭvažyli, što ŭkrainski muzyčny pradziusier Mikałaj Sosin praciahvaje supracoŭničać ź Biełteleradyjokampanijaj. Pry hetym pradziusier troch siezonaŭ biełaruskaha «X-faktara» niekalki razoŭ vyjazdžaŭ u Jeŭropu, dzie dapamahaŭ ukrainskim sielebryci ładzić dabračynnyja kancerty dla zboru srodkaŭ na patreby Ukrainy i jaje armii.
U svaim vypusku błohiery pryviali vypadki, kali Sosin tolki za adno leta 2022 hoda (paralelna pracujučy ŭ BT) sustrakaŭsia ŭ Bierlinie ź viadomym ukrainskim śpiavakom Manacikam, a ŭ Prazie bačyŭsia ź nie mienš viadomaj ukrainskaj śpiavačkaj Volhaj Palakovaj.
U abodvuch vypadkach Sosin dapamahaŭ ukrainskim zorkam źbirać hrošy dla Ukrainy i USU, adznačyli viadoŭcy šou «O(b)suždajem».
«Sosin zakryŭ svaje sacsietki adrazu paśla taho, jak ja daviedaŭsia ŭ niekalkich ludziej, jakija zaraz pracujuć ci ŭdzielničajuć u «Faktar.baj», što toj usio jašče pradziusuje biełaruskaje šou», — adznačyŭ błohier Ivan Prus u novym vypusku «O(b)suždajem».
Publikacyja ŭ aficyjnym instahram-akaŭncie śpiavaka Manacika, dzie toj anansuje svoj dabračynny kancert u Bierlinie na 20 červienia 2022 hoda (skrynšot źvierchu). Dalej idzie post z aficyjnaj fan-staronki Manacika za 21 červienia 2022 hoda, dzie možna ŭbačyć samoha śpiavaka ŭ kampanii Mikałaja Sosina (skrynšot źnizu)
Aficyjny anons dabračynnaha kancerta śpiavački Volhi Palakovaj u Prazie na 30 červienia — 1 lipienia 2022 hoda (skrynšot źvierchu), hrošy ź jakoha pavinny byli pajści na vajskovyja špitali Ukrainy. Na druhim skrynšocie źnizu viadoŭca šou «O(b)suždajem» Ivan Prus pakazvaje publikacyju Mikałaja Sosina ŭ instahramie za 1 lipienia 2022 hoda, dzie toj siadzić kala pulta hukarežysiora padčas kancerta Palakovaj
Mikałajem Sosinym taksama zacikavilisia žurnalisty z bujnoha ŭkrainskaha partała «MUZVAR». Jany paćvierdzili infarmacyju. A paśla patelefanavali Sosinu i spytali u jaho, jakim čynam były muzyčny pradziusier 7 siezonaŭ ukrainskaha «X-faktara» i były redaktar ukrainskaha nacyjanalnaha adboru na «Jeŭrabačańnie» paśla pačatku vajny prymudrajecca dapamahać USU i adnačasova pracavać na BT razam z takimi asobami, jak pravajenny repier Siaroha, Rusłan Alachno, Volha Buzava, Iosif Pryhožyn i inšyja.
«Padčas razmovy z Sosinym, toj byŭ u roŭminhu. Jon admoviŭsia paćviardžać svaju asobu i kamientavać svaju pracu ŭ «Faktar.baj». Spasyłaŭsia na toje, što nie razumieje sutnaści pytańnia, a zatym prosta prapanavaŭ «zakryć hetuju temu».
Charakterna, što Sosin usio jašče ličycca kiraŭnikom i zasnavalnikam ukrainskaj muzyčnaj studyi TataMusic, jakaja i ciapier aktyŭna dapamahaje ŭkrainskim artystam stvarać pieśni i vydavać ich praz ukrainskija łejbły», — padkreślili žurnalisty partała «MUZVAR».
Skrynšot repartažu BT pra druhi siezon «Faktar.baj», dzie ŭ adnym z kadraŭ možna ŭbačyć Mikałaja Sosina. Repartaž źniaty 2 kastryčnika 2022 hoda, praź niekalki miesiacaŭ paśla taho, jak Sosin źjeździŭ u Jeŭropu na dva kancerty ŭ dapamohu Ukrainie i USU
Mikałaj Sosin prapracavaŭ 9 hadoŭ na bujnym ukrainskim telekanale STB na pasadzie hałoŭnaha muzyčnaha pradziusiera, dzie ŭ tym liku zajmaŭsia ŭkrainskim «X-faktaram» i nacyjanalnym adboram Ukrainy na «Jeŭrabačańnie». U 2017 hodzie jon zvolniŭsia i ŭžo ŭ 2020 hodzie adnaviŭ dziejnaść u Biełarusi. Fota: publikacyja u fejsbuk-staroncy Sosina.
Nahadajem, što franšyza «Ch-faktar» — heta šou talentaŭ, jakoje źjaviłasia na brytanskich ekranach u 2004 hodzie. Stvaralnik prajekta, pradziusier Sajman Koŭeł, padhledzieŭ ideju ŭ inšaj zabaŭlalnaj prahramy, Pop Idol, dzie napiaredadni dva siezony prabaviŭ u jakaści člena žury. Padabienstva praduktaŭ było nastolki vielizarnym, što pryviało da abvinavačvańniaŭ u płahijacie dy sudovych pozvaŭ. Adnak losy prajektaŭ vyznačyŭ nie stolki arbitraž, kolki cikavaść hledačoŭ: «Ch-faktar» im padaŭsia bolej dynamičnym dy niepradkazalnym, što i paćvierdziła pipłamietryja. Jak vynik, Pop Idol syšoŭ z bujnych ekranaŭ.
Sutnaść šou prostaja: talenavityja ludzi prychodziać na prasłuchoŭvańni, sudździ abirajuć najbolš prydatnych, paśla peŭny čas vučać budučych zorak tajamnicam śpievaŭ — i pad kožny novy vypusk pieradačy ładziać kancerty. Paśla kožnaha z vystupaŭ najmienš rejtynhavyja ŭdzielniki «Ch-faktar» pakidajuć. I tak praciahvajecca niekalki dziasiatkaŭ vypuskaŭ, pakul nie vyznačajecca pieramožca.
Biełaruskaje telebačańnie nabyło franšyzu «X-faktar» u 2021 hodzie i zładziła tady svoj pieršy aficyjny siezon «Ch-faktar u Biełarusi». Ale potym kraina pazbaviłasia pravoŭ na aryhinalnuju pieradaču praz sankcyi i vajnu, tamu vyrašyła stvaryć svoj ułasny kłon papularnaj franšyzy pad nazvaj «Faktar.baj», u ramkach jakoha ŭ 2022 hodzie prajšoŭ druhi siezon šou, a z vosieni 2023 užo vychodzić treci.
Čytajcie taksama:
Biełarusy, jakija stali zorkami ŭ Rasii: što ź imi stała za čas poŭnamaštabnaj vajny?
Hasta la vista, baby. Zhadvajem samyja trešovyja numary Biełarusi na «Jeŭrabačańni»
Ad Saładuchi da Karža. Što biełaruskija sielebryci pościać padčas vajny i jak pra jaje vykazvajucca