Aryštavany ŭ Armienii biełarus Maksim Vajtkiavičus paprasiŭ palityčnaha prytułku
Vajtkiavičus abvieščany ŭ Biełarusi ŭ vyšuk pa abvinavačvańni va ŭchileńni ad słužby ŭ vojsku.
24-hadovy biełarus Maksim Vajtkiavičus, jakoha ŭ pačatku lutaha zatrymali na armianskaj miažy, a zatym źmiaścili pad vartu, paprasiŭ u Jerevanie dać jamu palityčny prytułak. Pra heta paviedamlaje Radyjo Svaboda sa spasyłkaj na armianskuju słužbu Svabody.
Vajtkiavičus abvieščany ŭ Biełarusi ŭ vyšuk pa abvinavačvańni va ŭchileńni ad słužby ŭ vojsku.
«Sud, nie dajučy acenki arhumientaŭ, pryniaŭ rašeńnie na padstavie taho, što čałaviek znachodzicca ŭ vyšuku ŭ inšaj krainie i tamu jon pavinien znachodzicca ŭ turmie da pastupleńnia chadajnictva ab ekstradycyi», — zajaviła advakatka Vajtkiavičusa Ani Šacinian.
Vajtkiavičus raspavioŭ pradstaŭnikam Chielsinkskaj hramadzianskaj asamblei, što ŭ 2020 hodzie ŭdzielničaŭ u demanstracyjach pratestu ŭ Biełarusi, paśla jakich jaho aryštavali na 14 sutak i katavali ŭ turmie.
Ale, pavodle advakata, armianski sud praihnaravaŭ usio heta i pryniaŭ rašeńnie aryštavać jaho.
Vajtkiavičus, jaki ŭciok ź Biełarusi, davoli doŭha žyŭ i pracavaŭ u Hruzii, pierš čym pryjechać u Jerevan na kancert. Ani Šacinian śćviardžaje, što biełaruskija pravaachoŭniki vykarystoŭvajuć raspačatuju kryminalnuju spravu jak padstavu dla pakarańnia maładoha čałavieka z apazicyjnymi pohladami, tamu armianskaja prakuratura nie pavinna ekstradavać jaho ŭ Biełaruś.
«Kali Armienija prymie rašeńnie ab ekstradycyi Vajtkiavičusa, jana stanie pramym saŭdzielnikam parušeńnia artykułu 3 Jeŭrapiejskaj kanviencyi ŭ pravach čałavieka, tamu što ŭžo jość vyraznyja abhruntavańni i śćviardžeńni, što čałaviek sapraŭdy ŭciok ad hvałtu», — padkreśliła jurystka.
Heta nie pieršy vypadak za apošni čas, kali ŭ Armienii zatrymlivajuć hramadzianina Biełarusi, jakoha pieraśledujuć ułady hetaj krainy.
Raniej biełaruskija ŭłady nakiravali ŭ Jerevan zapyt na ekstradycyju 24-hadovaha Jarasłava Novikava. Novikaŭ taksama raspavioŭ pra pieraśled u svajoj krainie, Novikaŭ taksama znachodzicca ŭ turmie i čakaje adkazu na svaju zajavu.
Pravaachoŭnyja orhany Biełarusi vinavaciać Novikava taksama va ŭchileńni ad vajskovaj słužby. Jany abviaścili jaho ŭ vyšuk, i pravaachoŭnyja orhany Armienii zatrymali mužčynu na armianska-hruzinskaj miažy. U turmie jon raspavioŭ supracoŭnikam mihracyjnaj słužby, što ŭdzielničaŭ u pratestach 2020 hodu, paśla čaho pierajechaŭ u Hruziju. Jon skazaŭ, što termin jaho znachodžańnia ŭ Hruzii skončyŭsia, i tamu jon vyrašyŭ pajechać u Armieniju. Novikaŭ skazaŭ, što aścierahajecca palityčnaha pieraśledu, kali vierniecca na radzimu. Jon taksama paprasiŭ palityčnaha prytułku ŭ Armienii.
Miž tym advakaty śćviardžajuć, što sudy mohuć pakinuć maładych biełarusaŭ na voli, bo jany ŭsio roŭna nie mohuć vyjazdžać z Armienii z-za zabarony.
Jak paviedamiła presavaja sakratarka mihracyjnaj słužby Armienii Neli Daŭcian, zhodna z zakanadaŭstvam, rašeńnie ab nadańni prytułku prymajecca na praciahu troch miesiacaŭ. Kali rašeńnie budzie admoŭnym, šukalnik prytułku moža abskardzić heta ŭ sudzie.
Čytajcie taksama:
Biełarusu, zatrymanamu ŭ Armienii, daduć palityčny prytułak
Biełarus, jakoha aryštavali ŭ Armienii praz vyšuk na radzimie, pieradaŭ list z turmy
U Armienii z pačatku hoda zatrymali na zapyt prakuratury Biełarusi čatyroch biełarusaŭ