U Prazie inšaziemca padazrajuć u sprobie teraktu na zamovu Rasii
U stalicy Čechii zatrymali inšaziemca pavodle padazreńnia ŭ padrychtoŭcy teraktu. Mužčynu abvinavačvajuć u sprobie padpalić aŭtobusy ŭ depo na paŭnočnym uschodzie horada. Premjer-ministr Čechii Petr Fijała havoryć, što za złačynstvam moža stajać Rasija, paviedamlaje «Radyjo Svaboda».
Praha. Fota: veectezy.com
26-hadovy padazravany prybyŭ u Čechiju z Paŭdniovaj Amieryki za niekalki dzion da zatrymańnia ŭ subotu. U hetyja dni ŭłady Čechii padymali ŭzrovień terarystyčnaj pahrozy ŭ krainie. Palicejskija patruli achoŭvali čyhunačnyja i aŭtobusnyja vakzały i handlovyja centry.
U paniadziełak situacyja abmiarkoŭvałasia na pasiadžeńni Dziaržaŭnaj rady biaśpieki. Na pres-kanfierencyi pa vynikach sustrečy premjer-ministar Fijała zajaviŭ, što padpał moh być častkaj hibrydnaj vajny Maskvy.
«Jość padazreńnie, što napad byŭ arhanizavany i prafinansavany z Rasii», — cytuje jaho vydańnie iDNES.
Śpiecsłužby niekatorych krain Zachadu zajaŭlajuć, što Rasija arhanizavała šerah padpałaŭ cyvilnych abjektaŭ u Jeŭropie, kab paŭpłyvać na pastaŭki zbroi Ukrainie. Kampanijaj pa padryvie vajskovaj padtrymki Kijeva z boku ich sajuźnikaŭ kiruje vajskovaja raźviedka HRU, śćviardžajecca ŭ artykule amierykanskaj haziety The New York Times.
U kancy traŭnia ŭ Polščy aryštavali dzieviać čałaviek, u tym liku dvaich biełarusaŭ, pa padazreńni ŭ dyviersijach na zamovu rasijskich śpiecsłužbaŭ. Maskva abvinavačvańni admaŭlaje.
Čytajcie taksama:
Stała viadoma imia jašče adnaho biełarusa, jaki pa zadańni HRU rychtavaŭ dyviersii ŭ Polščy
Da padpałaŭ u polskich handlovych centrach datyčny imavierny ziać biełaruskaha dypłamata