Jašče adzin źvierski prysud. Nastaŭnicy Darji Chmialnickaj dali 5,5 hadoŭ za padtrymku Ukrainy i ŭdzieł u pratestach
Stała viadoma pra prysud, vyniesieny 24-hadovaj nastaŭnicy kitajskaj movy Darji Chmialnickaj. Prajekt Dissidentby paviedamiŭ, što jaje asudzili na 5,5 hoda źniavoleńnia. Taki prysud ahučyła sudździa Alona Ananič, viadomaja svaim udziełam u palityčnych pracesach.
Darja Chmialnickaja. Fota z apošniaha zvanka. Krynica: Ukantakcie
Darji Chmialnickaj 24 hady, jana rodam ź Minska. Paśla zakančeńnia himnazii jana pastupiła na fiłfak BDU na śpiecyjalnaść «uschodniaja fiłałohija», vučyła kitajskuju movu. Jaje dypłom byŭ pryznany adnym z najlepšych dypłomaŭ fiłfaka 2022-ha.
Paśla zakančeńnia ŭniviersiteta Darja pajšła pracavać u svaju alma-mater, 23-ju himnaziju ŭ Minsku, dzie vykładała kitajskuju movu. Taksama jana pastupiła ŭ mahistraturu fiłfaka BDU.
Darja Chmialnickaja ŭdzielničała ŭ konkursach pa napisańni ese i pierakładach na biełaruskuju movu. Letaś jana zaniała druhoje miesca na konkursie «Ziarcała słovaŭ» u katehoryi «mastacki pierakład kitajskaj prozy na biełaruskuju movu».
Zatrymali jaje ŭvosień 2023 hoda, abvinavaciŭšy pa dvuch artykułach — č. 1 art 342 KK (aktyŭny ŭdzieł u dziejańniach, jakija hruba parušajuć hramadski paradak) i č. 2 art. 361-3 (finansavańnie ŭdziełu na terytoryi zamiežnaj dziaržavy ŭ vajennych dziejańniach). Sudzić dziaŭčynu pačali 22 krasavika ŭ Minskim haradskim sudzie.
Čytajcie taksama:
Siońnia pačynajecca sud nad nastaŭnicaj 23-j himnazii. Joj pahražaje da 10 hadoŭ źniavoleńnia