Aŭstryjski kancler choča, kab rasijska-ŭkrainskija mirnyja pieramovy prajšli ŭ jaho krainie

Fiederalny kancler Aŭstryi Karł Niechamier adreahavaŭ na vystupleńnie Uładzimira Pucina na Uschodnim ekanamičnym forumie va Uładzivastoku, dzie toj paŭtaryŭ svaje śćviardžeńni, što, maŭlaŭ, Rasija «nikoli nie admaŭlałasia ad pieramoŭ», a taksama paćvierdziŭ, što takija pieramovy mahčymyja na asnovie dakumientaŭ, jakija abmiarkoŭvalisia viasnoj 2022 hoda ŭ Stambule.

Karł Niechamier. Fota: Askin Kiyagan/Anadolu via Getty Images

«My zaŭvažyli zajavy rasijskaha prezidenta pra jaho adkrytaść da mirnych pieramoŭ», — napisaŭ u sacyjalnaj sietcy X kancler Aŭstryi.

Jon adznačyŭ, što Aŭstryja jak kraina, na terytoryi jakoj znachodzicca štab-kvatera Arhanizacyi pa biaśpiecy i supracoŭnictvie ŭ Jeŭropie, moža być prydatnym miescam dla pieramoŭ ab miry pamiž Rasijaj i Ukrainaj. Adnak, na dumku aŭstryjskaha kanclera, takija pieramovy pavinny prachodzić» biez papiarednich umoŭ».

Raniej Pucin kazaŭ, što Rasija hatovaja da pieramoŭ tolki ŭ tym vypadku, kali Ukraina sastupić joj terytoryi, pra anieksiju jakich raniej zajaviła Maskva. Prytym častka ź ich pa-raniejšamu znachodzicca pad kantrolem Ukrainy, a pad rasijskim nikoli nie była.

Vystupajučy va Uładzivastoku, jon nazvaŭ u liku mahčymych pasiarednikaŭ na mierkavanych pieramovach Kitaj, Braziliju i Indyju — krainy, jakija ŭstrymalisia ad asudžeńnia rasijskaj ahresii suprać Ukrainy i praciahvajuć palityčnaje dy ekanamičnaje supracoŭnictva z Maskvoj.

Kamientary da artykuła