«Miadovaja premija» adnaviłasia i vyznačyła sioletnich łaŭreataŭ
U 2001 hodzie paet-pčalar Mikoła Papieka zasnavaŭ Miadovuju premiju. Łaŭreat premii atrymlivaŭ pud miodu. Adnak z 2020 hoda premija nie ŭručałasia. Sioleta Mikoła jaje adnaviŭ, piša Radyjo Racyja.
U vieraśni Mikoła Papieka nazvaŭ imiony čarhovych łaŭreataŭ:
— Premija vychodzić, kali kazać pra hieahrafiju, troški dalej, raniej jana była pieravažna bieraściejskaja, ciapier budzie bolš pašyranaja. Tut dla mianie vielmi dobra vyhladajuć dźvie asoby — heta muž i žonka — Uładzimir Arłoŭ i Valancina Aksak. Valancina jak paetka, a Uładzimir viadomy i jak paet, i jak prazaik, i jak historyk, i jak papulizatar historyi. Ja liču, što heta vydatnyja asoby dla Miadovaj premii.
Mikoła Papieka. Fota: Radyjo Racyja
U roznyja hady siarod łaŭreataŭ Miadovaj premii byli takija viadomyja piśmieńniki ź Bieraściejščyny jak Aleś Kasko, Mikoła Kuprejeŭ, Leanid Vałasiuk, Pavieł Lachnovič, Mikoła Prakapovič i mnohija inšyja.