Izrail pravioŭ kibierataku na členaŭ «Chiezbały». Pejdžary 1200 bajevikoŭ adnačasova ŭzarvalisia prosta ŭ kišeniach VIDEA
dapoŭniena
Tysiačy členaŭ arhanizacyi «Chiezbała» paranienyja ŭ vyniku padryvu pryład suviazi, jakija vykarystoŭvalisia hrupoŭkaj.
Žurnalisty paviedamlajuć, što Izrailu ŭdałosia ŭzłamać partatyŭnyja pejdžary (hetyja pryłady vykarystoŭvajuć dla schavanaj kamunikacyi) i padarvać ich.
Izrail pakul incydent aficyjna nie kamientavaŭ.
Krynicy ŭ słužbach biaśpieki paviedamili ahienctvu Reuters, što ŭ vyniku incydentu tysiačy členaŭ «Chiezbały» atrymali surjoznyja ranieńni.
Iranskija ŚMI paviedamlajuć, što taki pejdžar byŭ i ŭ pasła Irana ŭ Livanie, jon taksama ŭzarvaŭsia, ambasadar paranieny.
Žurnalist ahienctva bačyŭ, jak 10 bajevikoŭ «Chiezbały» ściakali kryvioj ad ran prosta na vulicy paśla vybuchaŭ pryład u ich rukach abo kišeniach.
Paviedamlajecca, što źviestki pra ranieńni prychodziać i ź inšych rehijonaŭ Livana.
UPD. Bolš 2800 paranienych z-za vybuchaŭ pejdžaraŭ dastaŭleny ŭ balnicy Livana, bolš za 8 čałaviek zahinuli, paviedamlajuć livanskija ŚMI.
Balnicy Biejruta, Nabatyi, Sajdy i Cira pierapoŭnienyja paciarpiełymi ŭ vyniku vybuchaŭ pryład suviazi, jakija zdetanavali ŭ vyniku maštabnaj izrailskaj dyviersii, paviedamiŭ vykanaŭca abaviazkaŭ ministra achovy zdaroŭja Livana Firas Abjad.
Čytajcie taksama:
Izrail pačaŭ nanosić udary pa terytoryi Livana. «Chiezbała» zapuściła pa Izrailu sotni rakiet
«Jon byŭ jak pryvid». Jak Izrail zmoh zabić adnaho z kamandziraŭ «Chiezbały»
«Chiezbała» paviedamiła pra hatoŭnaść pačać vajnu suprać Izraila paśla zabojstva Ismaiła Chanii