U Tatarstanie asudžanaja dziajačka ruchu za niezaležnaść
U Tatarstanie na hod pazbaŭleńnia voli ŭmoŭna asudžanaja viadomaja dziajačka tatarskaha ruchu za niezaležnaść 59-hadovaja Faŭzija Bajramava.Bajramava pryznanaja vinavataj ŭ ździajśnieńni złačynstva, praduhledžanaha č. 1 art. 282 KK (uzbudžeńnie nianaviści albo varožaści, a taksama prynižeńnie čałaviečaj hodnaści).
U čym ža złačynstva? 20 śniežnia 2008 hodu ŭ horadzie Nabiarežnyja Čałny adbyłasia pasiedžańnie pašyranaj siesii hramadskaj arhanizacyi Respubliki Tatarstan «Mili Miedžlis tatarskaha naroda», na jakim byli pryniatyja zvarot da suśvietnaj supolnaści ab pryznańni dziaržaŭnaha suvierenitetu Respubliki Tatarstan i rezalucyja pra dziaržaŭny suvierenitet Tatarstanu. Paźniej, jak vyjaviła rasiejskaja prakuratura, paznačanyja materyjały «na prośbu abvinavačvanaj» byli źmieščanyja ŭ internecie.
Tatary — samaja šmatlikaja nacyjanalnaja mienšaść u Rasii. Maskva strymlivaje pracesy ŭmacavańnia ich nacyjanalnaj identyčnaści.Hetak, było admienienaje rašeńnie ab pieravodzie tatarskaj piśmovaści z kirylicy na łacinku, pryniataje parłamientam Tatarstana. Taksama sudy Rasii admovili tatarskim siemjam u ich pazovach ab pravie dla dziaciej zdavać centralizavanaje testavańnie na tatarskaj movie.
Bajramava, viadomaja nie tolki jak hramadskaja dziajačka, a taksama jak piśmieńnica, uziała siabie adkaznaść za źjezd u Nabiarežnych Čałnach. Varta adznačyć, što toj źjezd sfarmavaŭ urad niezaležnaha Tatarstana ŭ vyhnańni. Uznačalvaje hety ŭrad Vil Mirzajanaŭ, jaki pierabyvaje na emihracyi ŭ ZŠA.
Padrasiejski ŭrad Tatarstana na čale ź Mincimieram Šajmijevym stajaŭ na pazicyjach supracoŭnictva z Maskvoj. Sioleta zamiest Šajmijeva novym kiraŭnikom respubliki Kreml pryznačyŭ blizkaha da jaho pa pohladach premjera Rustama Minichanava.