Łukašenka prylacieŭ u Isłamabad. Horad z usich bakoŭ akružany pratestoŭcami
Horad, u jaki prylacieŭ Łukašenka z trochdzionnym vizitam, ciapier znachodzicca ŭ asadnym stanie pad achovaj dziasiatkaŭ tysiač siłavikoŭ i vajskoŭcaŭ. Da stalicy Pakistana z usich kutkoŭ krainy padyšli vielizarnyja kałony pratestoŭcaŭ, jakija patrabujuć vyzvaleńnia ich lidara i adstaŭki ŭrada. Apazicyja rychtujecca ŭvajści ŭ stalicu.
Łukašenku ŭ Isłamabadzie kala trapa samalota sustrakaje pakistanski premjer Šachbaz Šaryf, za imi idzie ministr zamiežnych spraŭ Biełarusi Maksim Ryžankoŭ, jaki prylacieŭ na dzień raniej. U vakolicach Isłamabada tym časam iduć šmattysiačnyja maršy apazicyi. Foty: Maaz Awan, Press Information Department / AP. Kałaž: «Naša Niva»
Stalica Pakistana Isłamabad, kudy siońnia prylacieŭ Łukašenka (a razam ź im i vialikaja delehacyja biełaruskich ministraŭ, čynoŭnikaŭ i pramysłoŭcaŭ — ahułam 80 čałaviek), ciapier nahadvaje izalavanuju krepaść — horad zakryty na zajezd i vyjezd, pierakrytyja ŭsie hałoŭnyja aŭtamahistrali, a taksama darohi da mižnarodnaha aeraporta Isłamabada.
Dla achovy horada mabilizavanyja 34 tysiačy siłavikoŭ i vajskoŭcaŭ, a hramadski transpart i škoły nie pracujuć, internet častkova zabłakavany, paviedamlajuć vydańnie Pakistan Today i inšyja miascovyja i suśvietnyja miedyja, mnohija ź jakich ciapier viaduć žyvyja tranślacyi ź miescaŭ padziei.
Łukašenka ŭ Isłamabadzie. Fota: Press Information Department via AP
Pa apošniaj infarmacyi, vielizarnyja aŭtakałony i maršy pratestoŭcaŭ užo znachodziacca na hałoŭnych zajezdach u horad. Ich ahulnaja kolkaść varjirujecca ad niekalkich dziasiatkaŭ da niekalkich sotniaŭ tysiač čałaviek (u toj ža čas pakistanskija ŭłady śćviardžajuć, što pratestoŭcaŭ usiaho krychu bolš za 10 tysiač).
Pieramovy pamiž uradam i apazicyjaj pakul nie dajuć vynikaŭ. Lidary pratestu admaŭlajucca spyniacca, a kiraŭnik MUS Pakistana Machsin Nakvi pahražaje ŭsim im aryštam i pačatkam stralaniny, adznačaje adno z najbujniejšych anhłamoŭnych vydańniaŭ Pakistana The News International (pavodle miedyja, padčas pratestaŭ byŭ zastreleny aficer palicyi, jašče niekalki paranienyja).
Acanić maštaby ciapierašnich pratestaŭ možna ŭnizie.
Vielizarnaja kałona pratestoŭcaŭ na adnym z hałoŭnych ujezdaŭ u Isłamabad. Fota: Naya Pakistan
Nahadajem, što sotni tysiač prychilnikaŭ byłoha premjer-ministra Pakistana Imrana Chana, jaki ciapier znachodzicca ŭ turmie, pa jahonym zakliku raspačali dniom u niadzielu ahulnanacyjanalny marš apazicyi na pakistanskuju stalicu Isłamabad z usich kutkoŭ krainy, patrabujučy vyzvaleńnia ich lidara i adstaŭki ŭrada.
Apazicyjnaje šeście sustreła žorstkuju reakcyju z boku pakistanskich uładaŭ, jakija mabilizavali palicejskich i vajskoŭcaŭ, adklučyli mabilny internet u zonach šeścia pratestoŭcaŭ, a taksama zabłakavali stalicu z usich bakoŭ, pierakryŭšy klučavyja darohi na ŭjeździe ŭ horad transpartnymi kantejnierami.
Pa źviestkach indyjskaha telekanała News18, ułady Pakistana praviali maštabnyja aryšty siarod členaŭ i aktyvistaŭ bujnoj apazicyjnaj Partyi spraviadlivaści (PTI), jakoj kiruje Imran Chan. Na hety momant viadoma pra zatrymańnie jak minimum 4 tysiač pratestoŭcaŭ pa ŭsioj krainie (siarod aryštavanych jość i parłamientaryi). Adnak da maršu praciahvajuć dałučacca ludzi z rehijonaŭ, i jon praciahvaje iści na stalicu.
Partyja spraviadlivaści (PTI) pa vynikach parłamienckich vybaraŭ u lutym 2024 hoda nabrała najbolšuju kolkaść miescaŭ (92) u Nacyjanalnaj asamblei Pakistana (nižniaja pałata parłamienta) praz padtrymku niezaležnych kandydataŭ, bo samoj partyi byŭ zabaronieny ŭdzieł u vybarach uładami Pakistana. Pavodle apošnich sacyjałahičnych apytańniaŭ, PTI padtrymlivajuć 35% nasielnictva (kala 85 miljonaŭ čałaviek), a sama partyja maje adnosna siabroŭskija znosiny z krainami Zachadu.
Adna ź vialikich kałon pratestoŭcaŭ, jakaja ruchałasia na pakistanskuju stalicu Isłamabad 24 listapada. Ułady krainy tym časam mabilizavali ŭsie svaje siłavyja orhany i zakryli stalicu na ŭjezd, błakujučy aŭtamahistrali transpartnymi kantejnierami. Foty: Muhammad Sajjad, Anjum Naveed / AP; Imran Bahadar / Pacific Press / LightRocket via Getty Images
Čytajcie taksama:
ZŠA ŭviali sankcyi suprać MZKC za padtrymku rakietnaj prahramy Pakistana