«Kali nabyŭ $20 pa kursie 3,3 — i ciapier ty paśpiachovy inviestar»: jak biełarusy reahujuć na skački valut

Pakul Ryhor Azaronak demanstratyŭna palić dalar, my pahladzieli, što kažuć zvyčajnyja biełarusy ŭ tyktoku nakont rekordaŭ dalara i jeŭra.

Siarod pieršych na sabie nastupstvy rekordaŭ dalara i jeŭra adčuli tyja, chto zdymaje kvatery.

— My zdymajem kvateru i jak šmat chto płacim u dalarach, — raspaviała ŭ tyktoku adna dziaŭčyna. — Ja za sutki prosta ašaleła. Voś u banku, u jakim ja absłuhoŭvajusia, amal na 10 kapiejek za sutki padniaŭsia kurs. I jašče rankam jon byŭ 3,55, zdajecca. Ciapier, praź niekalki hadzin, ja hladžu — 3,599. Prychodžu ŭ bank, a mnie kažuć: «Dalaraŭ niama». A kurs z kožnaj hadzinaj usio raście i raście.

Jana chvalujecca, što ciapier za arendnuju kvateru joj pryjdziecca płacić na 100 rubloŭ bolš, čym miesiac tamu.

Pra dziŭny vypadak u adnym ź biełaruskich bankaŭ raspavioŭ inšy błohier.

— Ja siońnia zdaŭ 100 dalaraŭ. Na kasach nikoha nie było. Paśla mianie — nu ja staju tam, buklety čytaju — padychodzić čałaviek i kaža, što choča kupić 100 dalaraŭ. A jamu adkazvajuć: «U nas niama».

Fiłasofskaje pytańnie: «Što rabić?» ludziej chvaluje:

— Chto bačyŭ, jak vyras jeŭra i dalar? Što rabić? Vy bačyli, jakija čerhi ŭ bankach? Valuty ŭžo praktyčna niama, — chvalujecca błohierka.

Jana śćviardžaje, što tydzień-paŭtara tamu jeŭra kuplali pa 3,53 rubla, a siońnia pabačyła ŭ Pryjorbanku pa 3,923.

— I ja nie viedaju, što rabić. Mnie kuplać ciapier ci pačakać? Pamiatajecie, jak u 2021 hodzie — spačatku ŭsio vyrasła da 4, a potym rezka ŭsio ŭpała. I ludzi adrazu ŭsio skupili, a potym šmat stracili na roźnicy kursaŭ.

Jašče adna błohierka nie razumieje ahulnych nastrojaŭ i śćviardžaje, što znajści dalary nie vielmi składana. Žančyna ciapier robić ramont u kvatery i kaža, što rabočyja sami prosiać raźličvajucca ź imi ŭ biełaruskich rublach, a nie ŭ zamiežnaj valucie. Adzinaje, što jaje chvaluje — baćki ŭ škole jaje dziciaci vyrašyli źbirać na vypuskny taksama ŭ biełaruskich rublach.

— Z vypusknym było pytańnie. Padličyli sumu ŭ dalarach, ale vyrašyli ŭsio zdavać u rublach. Ale ž da červienia kurs, chutčej za ŭsio, źmienicca i pryjdziecca nam jašče dapłačvać. A prapanoŭvali my zdać dalarami.

Maci, jakaja znachodzicca ŭ dekretnym adpačynku, pasprabavała iranizavać na hetuju temu, ale atrymałasia davoli sumna.

— Pakul usie tam panikujuć, što dalar padniaŭsia na 3 kapiejki, ja vam pakažu, čamu panikuju ja. U adzin momant usio zakančvajecca: šampuń, hiel dla duša, maska dla vałasoŭ, zubnaja pasta, navat kavałak myła. Nu vy razumiejecie.

Maładaja žančyna demanstruje amal pustyja słoički, zasochłuju tuš.

— Vy razumiejecie, što ŭsio zakančvajecca, usio. A vy mnie tam pra niejkija dalary.

Ale ŭ podpisie da videa jana piša, što navina pra dalar žudasnaja, asabliva dla tych, chto zdymaje kvateru.

Kaniečnie, biełarusaŭ ciažka ździvić pustymi abmieńnikami i skokami valutnych kursach. Usio ž za 30 hadoŭ takoj lubimaj prapahandystami «stabilnaści» takija situacyja zdaralisia nie adnojčy. Tamu žartaŭ u tyktoku taksama chapaje.

 — Kali nabyŭ 20 dalaraŭ pa kursie 3,3 rubli — i ciapier ty paśpiachovy inviestar, — pažartavaŭ adzin z błohieraŭ.

Svajo žartaŭlivaje videa zapisaŭ i humarystyčny tyktok-akaŭnt «Baba Hala rulić». Nad im pracuje biełaruskaja kamanda, jakaja niadaŭna zapuściła i YouTube-kanał «Łukašołki».

Dźvie pieraapranutyja babuli ŭ kadry raspaviadajuć pra padziei ŭ Biełarusi z humaram i satyraj, imknučysia pryciahnuć uvahu aŭdytoryi 50+. Temu sa skačkami kursaŭ valut jany ŭžo taksama abmierkavali.

Kamientary da artykuła