ŠI-porna pačynaje vyciaśniać zvyčajnaje. «Onlifanz» pieratvarajecca ŭ płatformu dypfejkaŭ

ŠI-instrumienty dazvalajuć zamianiać ludziej dypfejkami, jakija prynosiać prybytak nie mienšy za sapraŭdnych madelaŭ, bo lepš traplajuć u fantazii hledačoŭ.

Skryn adnaho ź videa, u jakich raskazvajecca, jak stvarać fejkavyja vyjavy. Krynica: wired.com

«Ličbavaja epocha pastajanna raźvivajecca, i razam ź joj bolš šyrokimi i raznastajnymi stanoviacca mahčymaści dla stvareńnia kantentu», — havorycca na sajcie, jaki rekłamuje novuju madel biznesu — OFM IA — OnlyFans mieniedžmient z vykarystańniem štučnaha intelektu.

Kali pry tradycyjnym viadzieńni OnlyFans-akaŭnta mieniedžar vystupaŭ pasrednikam pamiž madellu — stvaralnicaj kantentu i aŭdytoryjaj, dapamahajučy joj kiravać ulikovym zapisam i zabiaśpiečvać efiektyŭnuju prysutnaść u internecie, to novaja technałohija mianiaje padychod.

Raspracoŭščyki novaj płatformy zajaŭlajuć, što dziakujučy vykarystańniu virtualnych madelaŭ i mahutnych aŭtamatyzavanych instrumientaŭ OFM IA spraščaje praces stvareńnia i raspaŭsiudžańnia kantentu. Ciapier nie treba šukać madelaŭ, dastatkova stvaryć ich z dapamohaj štučnaha intelektu. Heta spraščaje praces i robić jaho bolš prybytkovym.

U vyniku šmat chto z maładych pradprymalnikaŭ pieraklučajecca na hety mienš pracazatratny sposab zarobku. Ale pobač z vysokaj manietyzacyjaj hety typ biznesu parušaje etyčnyja i jurydyčnyja normy. Na heta źviartajuć uvahu aŭtary artykuła ŭ Le Monde.

Pradprymalniki, jakija časta pracujuć z Dubaja (jaki viadomy nizkim padatkaabkładańniem i libieralnym zakanadaŭstvam), aktyŭna prapahandujuć novy biznes na asnovie technałohij OFM IA, publikujuć instrukcyi, jakija vučać tamu, jak stvarać madeli z vykarystańniem štučnaha intelektu. Asobnyja z takich videa nabirajuć sotni tysiač prahladaŭ na YouTube.

Aproč biaspłatnych instrukcyj, aŭtary prapanujuć płatnyja kursy, jakija faktyčna źjaŭlajucca ich asnoŭnaj krynicaj dachodu. Hetyja kursy abiacajuć navučyć usich achvotnych tonkaściam stvareńnia i kiravańnia takimi virtualnymi madelami, pieratvarajučy prodažy navučańnia ŭ klučavy elemient ich biznesu.

Zastaŭka adnaho ź videa, aŭtar jakoha rekłamuje OFM AI

Pradprymalniki, jakija zajmajucca biznesam na asnovie OFM IA, nie tolki ŭvieś čas chvalać pośpiechi svaich falšyvych profilaŭ i finansavyja dasiahnieńni, kab pryciahnuć novych ludziej u svaje finansavyja piramidy, ale i zaachvočvajuć kradziež kantentu realnych asob. Žančyny, čyje vyjavy vykarystoŭvajucca, zvyčajna nie viedajuć pra toje, što adbyvajecca, i nie dajuć zhodu na vykarystańnie ich kantentu.

Achviarami stanoviacca try katehoryi žančyn. U pieršuju čarhu heta stvaralnicy eratyčnaha abo seksualnaha kantentu, čyje fatahrafii ci videa trapili ŭ internet. Hetyja materyjały, prapuščanyja praz žorny štučnaha intelektu, pierapradajucca.

Druhaja katehoryja — lifestyle-błohiery-influjensiery, jakija dzielacca kantentam, źviazanym z roznymi aśpiektami svajho štodzionnaha žyćcia, i majuć značnuju aŭdytoryju prychilnikaŭ. U ich stvaralniki fejkavych vobrazaŭ zvyčajna kraduć zdymki ŭ kupalnikach.

Treciaja katehoryja achviar — zvyčajnyja maładyja žančyny, jakija nikomu nieviadomyja. Ich paŭsiadzionnyja vyjavy taksama pieraŭtvarajucca dla stvareńnia pryvabnaha kantentu fejkavych akaŭntaŭ dla pryciahnieńnia klijentaŭ.

Žurnalisty Le Monde pahavaryli z pradprymalnikam, jakija pracuje z OFM IA. Jon pryznaŭsia, što dla stvareńnia adnaho falšyvaha profilu na roznych płatformach vykarystoŭvaje fota i videa niekalkich žančyn. Naprykład, dla pastoŭ i videa ŭ Instagram mužčyna pieraŭtvaraje vyjavy zvyčajnych žančyn, a dla kantentu, jaki manietyzujecca, madelaŭ OnlyFans.

Siońnia sotni falšyvych akaŭntaŭ u Instagram, TikTok i X publikujuć fejkavyja fota i videa dziaŭčat u prynadlivych pozach i nakiroŭvajuć karystalnikaŭ na płatnyja płatformy, dzie im prapanujuć nabyć «pryvatny» kantent, stvorany na asnovie skradzienych vyjaŭ, jakija z dapamohaj štučnaha intelektu źmienienyja i pierapracavanyja biez zhody tych asob, čyje fota i videa byli vykarystanyja ŭ jakaści asnovy.

Žurnalisty amierykanskich vydańniaŭ 404 Media i Wired praviali ŭłasnaje rasśledavańnie i śćviardžajuć, što naličyli zvyš tysiačy akaŭntaŭ tolki ŭ Instagram, kantent jakich stvorany z dapamohaj štučnaha intelektu. Jaho aŭtary dzielacca ŭ supołkach na Discord paradami, stratehijami i infarmacyjaj pra toje, jak efiektyŭna zarabić hrošy z dapamohaj «ŠI-prastytucyi». Niekatoryja z dadatkaŭ svabodna raspaŭsiudžvajucca ŭ mahazinach Apple App i Google Play.

Rasśledavańnie pakazvaje, što toje, što raniej było nišavaj prablemaj, ciapier stała masavaj źjavaj, i heta demanstruje, što sacyjalnyja sietki ŭ najbližejšaj budučyni mohuć stać prastoraj, dzie štučny intelekt zasłaniaje čałaviečy.

Užo siońnia, jak pryznałasia žurnalistam adna z madelaŭ OnlyFans — Elaina St James, jany sutykajucca z kankurencyjaj z boku fejkavych akaŭntaŭ, stvoranych z dapamohaj štučnaha intelektu. Tak, za dziesiać miesiacaŭ hetaha hoda, pa słovach madeli, kolkaść prahladaŭ u miesiac u jaje ŭpała da 500 tysiač, da hetaha dziaŭčyna zvyčajna nabirała ad 1 da 5 miljonaŭ.

Dziejnaść pa stvareńni fejkavych akaŭntaŭ šmat u čym niezakonnaja, bo parušajucca pravy na vyjavu i asabistyja pravy ludziej, fota i videa jakich vykarystoŭvajuć bieź ich zhody. U toj ža čas uładalniki takich płatformaŭ, jak Instagram, nie mohuć ci nie chočuć spynić patok fejkavaha kantentu, stvoranaha z dapamohaj štučnaha intelektu.

Kamientary da artykuła