Na naradzie ŭ Łukašenki siońnia havorka išła nie pra toje, što zajaŭlena?
Źviarnuli ŭvahu, što na naradzie, pryśviečanaj «zamiežnamu handlu», bolšaść składali siłaviki. Prysutničali navat ministry abarony i pa nadzvyčajnych situacyjach.
Narada ŭ Alaksandra Łukašenki 17 studzienia. Skrynšot ź videa
Alaksandr Łukašenka ŭsio jašče sipić — napeŭna, pieranios ciažkaje reśpiratornaje zachvorvańnie.
Na naradu ŭ siabie 17 studzienia jon sabraŭ premjera Ramana Hałoŭčanku, staršyniu Nacbanka Paŭła Kałaŭra, a taksama kiraŭnika Rady biaśpieki Alaksandra Valfoviča, ministra abarony Viktara Chrenina, staršyniu KDB Ivana Cierciela i staršyniu Vajskova-pramysłovaha kamiteta Dźmitryja Pantusa. I navat kiraŭnika Ministerstva pa nadzvyčajnych situacyjach Vadzima Siniaŭskaha.
«Ni dla kaho nie sakret, što my bolš za ŭsio siońnia handlujem na ŭschodnim kirunku», — skazaŭ jon u toj častcy ŭstupnaha słova, jakaja trapiła na videa.
Jon havaryŭ pra supracoŭnictva z «dziasiatkam» krain Azii i Afryki.
«Nam heta treba? Treba. Zmožam my ich zadavolić? Ciažka skazać. U nas nie takaja hihanckaja ekanomika. Ale budziem ruchacca», — skazaŭ Łukašenka.
Miarkujučy pa namiokach i pa składzie ŭdzielnikaŭ: ministry-siłaviki i staršynia Vajskova-pramysłovaha kamiteta, havorka išła pra vialikija kantrakty dla biełaruskaha VPK — mahčyma, sakretnaha charaktaru abo z krainami, supracu ź jakimi nie chočuć razhałošvać.
«Razmova išła ŭ asnoŭnym pra našu taktyku pracy pa asobnych kirunkach našaj zamiežnaekanamičnaj dziejnaści. Jość puł krain, i jon niemały, jakija zacikaŭlenyja, jak i my, u supracy va ŭsich halinach: ad vajskova-techničnaha sucpracoŭnictva da inviestycyjnaha, bankaŭskaha i h.d. Mnohija ź ich nosiać taki kompleksny i stratehičny charaktar. Tamu tut uciahnutyja ŭsie struktury dziaržaŭnaj ułady i kiravańnia, pačynajučy ź siłavikoŭ i skančajučy finansistami. Tamu siońnia abmiarkoŭvałasia vystrojvańnie adnosin z cełym šeraham takich dziaržaŭ, našych partnioraŭ u afrykanskim, azijackim rehijonach, — paŭnamiokami patłumačyŭ paśla narady premjer-ministr Raman Hałoŭčanka. — I kankretnyja praktyčnyja zadačy, jakija naležyć vyrašyć i cyvilnamu, i siłavomu błoku, kab my atrymali ad hetaha zrazumieły i čakany efiekt».