U Litvie šyrycca fejk, što tamtejšaja raźviedka rychtuje vajenizavanyja hrupy biełarusaŭ
Litoŭski Departamient dziaržaŭnaj biaśpieki (DDB) papiaredžvaje pra raspaŭsiudžańnie fejkavaha dakumienta ŭ Facebook. U dakumiencie śćviardžajecca, što litoŭskaja raźviedka rychtuje vajenizavanyja hrupy biełarusaŭ, paviedamlaje LRT.
Pavodle DDB, heta častka infarmacyjnaj kampanii suprać Litvy, jakaja źviazana z nabližeńniem prezidenckich vybaraŭ u Biełarusi.
«Apublikavany ŭ Facebook fiktyŭny dakumient DDB pra dziejnaść raźviedki, jakaja byccam by zajmajecca padrychtoŭkaj vajenizavanych biełaruskich farmavańniaŭ, źjaŭlajecca adkrytaj padrobkaj. Jon nie maje nijakaha dačynieńnia da realnaj dziejnaści DDB i pavinien razhladacca jak častka praciahłaj infarmacyjnaj kampanii suprać Litvy», — havorycca ŭ paviedamleńni DDB, raźmieščanym u Facebook.
Departamient taksama adznačaje, što ŭ dakumiencie šmat arfahrafičnych pamyłak, što śviedčyć pra jaho niesapraŭdnaść.
U DDB padkreślili, što ŭ suviazi z nabližeńniem prezidenckich vybaraŭ u Biełarusi nazirajecca ŭzmacnieńnie infarmacyjnych atak. U pryviedzienych frahmientach fejkavaha dakumienta śćviardžajecca, što DDB byccam by pryniaŭ rašeńnie ab stvareńni kantralavanaha «vajenna-patryjatyčnaha kłuba «Lićviny»», apisvajucca charaktarystyki jaho ŭdzielnikaŭ i zhadvajecca «niedastatkovaja padrychtoŭka kłuba dla raźvićcia aktyŭnych dziejańniaŭ u adnosinach da Biełarusi».
DDB zaklikaje hramadzian Litvy i Biełarusi krytyčna stavicca da padobnaj infarmacyi i praviarać jaje sapraŭdnaść.