Tramp abjaviŭ ab vychadzie ZŠA sa składu Suśvietnaj arhanizacyi achovy zdaroŭja
Prezident Złučanych Štataŭ Donald Tramp padpisaŭ ukaz ab vychadzie ZŠA z Suśvietnaj arhanizacyi achovy zdaroŭja (SAAZ). Na dumku ekśpiertaŭ, hetaje rašeńnie moža niehatyŭna paŭpłyvać na hłabalnuju sistemu achovy zdaroŭja i ŭskładnić baraćbu z budučymi pandemijami.
Fota: Harold Cunningham / Getty Images
Tramp rastłumačyŭ svajo rašeńnie niapravilnymi rekamiendacyjami SAAZ u časie pandemii COVID-19, niazdolnaściu arhanizacyi da reform i «niespraviadliva vysokija finansavyja ŭznosy ZŠA».
«Suśvietnaja arhanizacyja achovy zdaroŭja abkradała nas, usie abkradajuć Złučanyja Štaty. Hetaha bolš nie budzie», — zajaviŭ Tramp.
Tramp krytykuje SAAZ jašče z 2020 hoda, abvinavačvajučy arhanizacyju ŭ sadziejničańni namahańniam Kitaja «ŭvieści śviet u zman» adnosna pachodžańnia COVID.
Rašeńnie Trampa aznačaje, što praz 12 miesiacaŭ ZŠA vyjduć z ahienctva Arhanizacyi Abjadnanych Nacyj u śfiery achovy zdaroŭja i spyniać finansavuju padtrymku jaho pracy.
Złučanyja Štaty na siońnia źjaŭlajucca najbujniejšym finansavym donaram SAAZ, na jaki prypadaje kala 18% jaje ahulnaha finansavańnia. Apošni dvuchhadovy biudžet SAAZ na 2024—2025 hady skłaŭ $6,8 młrd.