Chto taja prafsajuznaja aktyvistka z MAZa, jakaja paprasiła Łukašenku razabracca ŭ jutubie z «biehłymi»?
28-hadovaja vypusknica fakulteta mižnarodnych adnosin BDU Nastaśsia Karotčykava piša vieršy pra rodnuju movu i rabiła studencki časopis razam z budučym «ekstremistam».
Kali Alaksandr Łukašenka naviedvaŭ MAZ, adno z pytańniaŭ — naturalna, zahadzia padrychtavanaje, zaćvierdžanaje i adrepietavanaje, — było pra mahčymaść spynić «ukidy i pravakacyi ad biehłych» na jutubie, a taksama pra ajčynnyja alternatyvy videaservisu. Jaho zadała 28-hadovaja Nastaśsia Karotčykava. Palityku daviałosia tłumačyć, što samaje kaštoŭnaje — pieramahčy vorahaŭ na ichnim ža poli.
Nastaśsia Karotčykava zadała Łukašenku pytańnie pra jutub. Skrynšot videa STB
Chto takaja Nastaśsia Karotčykava, jakoj daručyli hetaje pytańnie?
Dziaŭčyna naradziłasia ŭ 1996 hodzie ŭ Minsku. U 1998 hodzie siamja pierajechała ŭ ahraharadok Atolina Minskaha rajona, dzie Nastaśsia pajšła ŭ Pryłuckuju siaredniuju škołu.
U 2018 hodzie Karotčykava skončyła fakultet mižnarodnych adnosin Biełaruskaha dziaržaŭnaha ŭniviersiteta. Navukovym kiraŭnikom jaje dypłomnaj pracy «Mižnarodny imidž Biełarusi» była łukašenkaŭski analityk Volha Łazorkina ź Biełaruskaha instytuta stratehičnych daśledavańniaŭ (BISD). Karotčykava vałodaje anhlijskaj i francuzskaj movami.
Prafaktyvistka Karotčykava: «UNS — heta sapraŭdnaja prajava demakratyi». Fota: 1prof.by
Ale z dypłamatyčnaj karjeraj nie skłałasia. Ciapier dziaŭčyna pracuje na MAZie, dzie prynamsi z 2022 hoda zajmaje pasadu načalnicy adździeła ŭpraŭleńnia zakupak ahrehataŭ i tranśmisij. Źjaŭlajecca členam Rady moładzi zavoda, staršynioj kamisii pa pracy siarod moładzi praŭładnaha prafsajuza «Biełprafmaš».
Aktyŭna ŭdzielničaje ŭ hramadskim žyćci, śpiavaje na zavodskich konkursach, udzielničaje ŭ patryjatyčnych akcyjach, ahituje da ŭdziełu ŭ vybarach, pradstaŭlaje pradpryjemstva na dziaržaŭnych mierapryjemstvach — standartny nabor praŭładnaj prafsajuźnicy. Za svaju dziejnaść u vieraśni 2023 hoda navat atrymała padziaku ad Łukašenki.
Karotčykava adkazvaje za pracu siarod moładzi praŭładnaha prafsajuza «Biełprafmaš». Fota: telehram-kanał «Avtozavodiec MAZ»
U 2023 hodzie Karotčykava atrymała padziaku ad Łukašenki. Fota: telehram-kanał «Avtozavodiec MAZ»
Ale duša prahnie paezii. Nastaśsia napisała svoj pieršy vierš u siamihadovym uzroście. U 2017 hodzie vydała svaju knihu «Do minor». Udzielničała ŭ šmatlikich litaraturnych konkursach, staŭšy łaŭreatkaj konkursu «Talenty Biełarusi», premii «Adkryćcio hoda» praŭładnaha Sajuza piśmieńnikaŭ Biełarusi. U 2018 hodzie była vyłučana na Nacyjanalnuju premiju Biełarusi ŭ naminacyi «Najlepšy debiut». Siońnia Karotčykava — siabra Minskaha haradskoha adździaleńnia SPB.
Karotčykava jak redaktarka studenckaha almanacha «aBDUmana». Fota: supołka VK
U studenckija hady razam z Alaksandram Paršankovym, budučym kiraŭnikom kamisii pa spravach studenctva Kaardynacyjnaj rady, była redaktarkaj litaraturnaha almanachu «aBDUmana», pra što śviedčyć staronka va «Ukantakcie». Ciapier profil samoj Karotčykavaj vydaleny, a inšyja sacsietki zakrytyja.
Svaje vieršy piša pa-rusku i pa-biełarusku. Adzin ź ich pryśviečany rodnaj movie:
«I niama radniejšaha słova
Za praściejšaje heta «mova».
Heta słova hučyć u chacie,
Dzie maja zastałasia maci,
Heta słova hučyć u rečcy,
U zarosłaj travoju ściežcy,
Čuju ja jaho ŭ niebie błakitnym,
I ŭ prostaj majoj ryfmie».
Karotčykava stała pieramožcaj zavodskaha konkursu «Hołas MAZa» ŭletku 2024 hoda. Fota: telehram-kanał «Avtozavodiec MAZ»
U ciapierašnim vobrazie Karotčykava ahituje hałasavać za Łukašenku. Fota: telehram-kanał «Avtozavodiec MAZ»