Dyrektarka minskaj turfirmy pradała nieisnujučyja tury na 170 tysiač rubloŭ. Jaje zatrymali praz try hady
Žančyna chavałasia ŭ Rasii.
Fota: Śledčy kamitet
Žančyna zaniałasia turystyčnym biznesam u vieraśni 2019 hoda. Skandał ź nieisnujučymi pucioŭkami zdaryŭsia ŭ 2021-m. Amal čatyry dziasiatki jaje klijentaŭ nikudy nie palacieli, a sama jana źjechała ŭ Rasiju.
«Minčanka prydumlała dla pakupnikoŭ roznyja pryčyny: patrabujecca dadatkovaja pošlina dla afarmleńnia vizy abo nieabchodna terminova ŭnieści pieradapłatu za tranśfier. Akramia taho, žančyna nie saromiełasia sistematyčna brać u doŭh hrošy ŭ klijentaŭ dla raźvićcia turystyčnaha biuro», — paviedamlaje SK.
U 2021 hodzie śledčyja raspačali kryminalnuju spravu pavodle č. 4 art.209 (machlarstva, učynienaje ŭ asabliva bujnym pamiery). Vyśvietliłasia, što minčanka pavinna za pucioŭki bolš za 170 tysiač rubloŭ, jana źjechała z krainy i kala troch hadoŭ była ŭ vyšuku.
U kastryčniku 2024 hoda śledčyja atrymali infarmacyju, što žančyna znachodzicca ŭ Rasii. Jana zatrymanaja, razhladajecca pytańnie ab jaje ekstradycyi ŭ Biełaruś.
Onlíner pisaŭ pra hetuju historyju ŭ 2021 hodzie. Bolš za 30 paciarpiełych sprabavali viarnuć hrošy, jakija jany zapłacili minskaj turfirmie. «Situacyja takaja: my ŭ vyniku pracy ŭ kavidnym režymie apynulisia ŭ ciažkim stanoviščy. Sprabujem razabracca z našymi prablemami», — kamientavała tady dyrektar kampanii.
Adna z paciarpiełych, Nadzieja, paćvierdziła vydańniu, što havorka idzie mienavita pra hetuju historyju.
Na žal, hrošy viarnuć pakul nie atrymałasia.
Ciapier Śledčy kamitet šukaje paciarpiełych ad schiemy z turystyčnymi pucioŭkami. Paciarpiełyja mohuć źviartacca pa telefonach: 8 (017) 389-55-55 i 8 (044) 500-31-11.