Interpał vydaŭ «čyrvonaje apaviaščeńnie» na vyšuk vinavatych u pasadcy samalota Ryanair u 2021 hodzie

Nacyjanalnaja prakuratura Polščy šukaje traich hramadzian Biełarusi, jakija majuć dačynieńnie da prymusovaj pasadki polskaha samalota kampanii Ryanair u Minsku ŭ mai 2021 hoda.

Dvoje mužčyn abvieščanyja ŭ mižnarodny vyšuk pavodle «čyrvonaha apaviaščeńnia» Interpoła, u dačynieńni da treciaha idzie pracedura atrymańnia takoha dakumienta. U Akruhovy sud Varšavy padali zajavy nakont vydačy jeŭrapiejskich ordaraŭ na aryšt u dačynieńni ŭsich asobaŭ u vyšuku, pieradaje RMF24.

Pa słovach pres-sakratarki hienieralnaha prakurora Polščy Hanny Adamiak, Mazaviecki adździeł Departamienta baraćby z arhanizavanaj złačynnaściu i karupcyjaj Nacyjanalnaj prakuratury kantraluje śledstva, što viadzie Ahienctva ŭnutranaj biaśpieki Polščy ŭ spravie pra zachop kantrolu nad polskim samalotam 23 traŭnia 2021 hoda ŭ Biełarusi.

Pavodle viedamstva, supracoŭniki avijadyśpietčarskaj słužby pieradali chłuślivuju infarmacyju pra nibyta zakładzienaje na borcie vybuchovaje prystasavańnie, vymusiŭšy ekipaž zrabić avaryjnuju pasadku ŭ Minsku.

«U chadzie rasśledavańnia byli vyniesienyja zahady nakont vystaŭleńnia abvinavačańniaŭ trom hramadzianam Biełarusi, jakija niepasredna majuć dačynieńnie da zachopu samalota — byłoha dyrektara «Biełaeranavihacyi» Leanida Čuro, načalnika źmieny kantrolu Jaŭhiena Cyhanova i aficera KDB Andreja A. M.», — paviedamiła Adamiak. Ich abvinavačvajuć u terakcie: zachopie samalotu šlacham padmanu i niezakonnym pazbaŭleńni voli pasažyraŭ i ekipažu. Za heta pahražaje da 12 hadoŭ turmy.

Praz znachodžańnie padazravanych pa-za miežami Polščy prakuratura hetaj krainy nakiravała ŭ Interpał zapyty pra publikacyju «čyrvonaha apaviaščeńnia» na terytoryi ŭsich krain, što ŭvachodziać u Mižnarodnuju arhanizacyju kryminalnaj palicyi. Paviedamlajecca, što ŭ dačynieńni da dvuch padazravanych užo raspačaty mižnarodny vyšuk, adnosna ž treciaha praces afarmleńnia praciahvajecca.

Nahadajem, što samalot Ryanair, jaki lacieŭ z Afin u Vilniu, 23 maja 2021 hoda byŭ prymusova pasadžany ŭ Minsku nibyta z-za paviedamleńnia ab vybuchovaj pryładzie na borcie. Paśla pasadki byli zatrymanyja błohier Raman Pratasievič i jahonaja siabroŭka Safija Sapieha. Paźniej jany byli asudžanyja ŭ Biełarusi na vialikija terminy źniavoleńnia, a paśla pamiłavanyja za supracu sa śledstvam.

Paśla hetaha incydentu Jeŭrasajuz zabaraniŭ biełaruskim avijakampanijam ažyćciaŭlać rejsy ŭ aeraporty supolnaści i nad jaho terytoryjaj, a taksama parekamiendavaŭ jeŭrapiejskim pieravozčykam admovicca ad palotaŭ u pavietranaj prastory Biełarusi.

Mižnarodnaja arhanizacyja hramadzianskaj avijacyi (ICAO) u svaim dakładzie pryjšła da vysnovy, što źviestki ab najaŭnaści bomby na borcie samalota byli zahadzia łžyvymi.

Kamientary da artykuła