Inicyjatyvie pa vydačy pašpartoŭ novaj Biełarusi dała acenku prakuratura Litvy
List namieśnika Hienieralnaha prakurora Litvy Hintasa Ivanaŭskasa, nakiravany ŭ Biełaruskaj pašpartny centr u Vilni (jon budzie vypuskać pašparty Novaha Biełarusi), apublikavała vydańnie «Lusterka».
Fota: Vasily Krestyaninov SOPA Images LightRocket via Getty Images
List za podpisam namieśnika hienprakurora Litvy Hintasa Ivanaŭskasa byŭ nakiravany ŭ Biełaruski pašpartny centr 27 studzienia. Kopii nakiravany ŭ kancylaryju prezidenta Hitanasa Naŭsiedy, Siejm, miascovyja MZS i MUS, a taksama Departamient dziaržaŭnaj biaśpieki. Z tekstu vynikaje, što heta adkaz na zapyt BPC adnosna zakonnaści vytvorčaści i vykarystańnia dakumientaŭ.
— Płanavanyja da vyrabu i vydačy novyja pašparty hramadzian Biełarusi, pakul hetyja dakumienty asoby nie buduć pryznany ŭ paradku, ustanoŭlenym zakonami Litoŭskaj Respubliki, buduć ličycca niesapraŭdnymi dakumientami, jakija nie dajuć uładalniku takoha pašparta nijakich pravoŭ na zakonnaje atrymańnie dazvołu na časovaje pražyvańnie ŭ Litvie, — adznačajecca ŭ liście.
U liście Ivanaŭskas adznačaje, što art. 300 KK Litvy praduhledžvaje adkaznaść za vyrab abo vykarystańnie zahadzia padroblenaha paśviedčańnia asoby. Ci buduć ličyć pašpart Novaj Biełarusi takim — pytańnie adkrytaje.
U Biełaruskim pašpartnym centry «Lusterku» paćvierdzili, što list Hienprakuratury sapraŭdny. Dyrektar BPC Maryus Hudełajcis tłumačyć, što heta adkaz na zvarot arhanizacyi, nakiravany jašče ŭ listapadzie 2024 hoda:
— My viadziem kamunikacyju ź dziaržaŭnymi ŭstanovami Litvy i inšych krain na pastajannaj asnovie, kab vypracavać adpaviednyja rašeńni dla biełarusaŭ, jakija znachodziacca na terytoryi Jeŭrapiejskaha sajuza i nie mohuć abnavić svaje dakumienty, u tym liku adnosna statusu pašparta Novaj Biełarusi.
Dyrektar BPC nastojvaje, što list namieśnika hienprakurora Litvy nosić infarmacyjny charaktar.
— Z momantu adpraŭki našaha zapytu jašče ŭ kancy minułaha hoda my ŭžo skarektavali niekatoryja aśpiekty ŭ adpaviednaści z zakonami Litvy i ES, — śćviardžaje Hudełajcis. — My imkniemsia zabiaśpiečyć pravavuju dakładnaść i pracujem u ramkach jeŭrapiejskaha zakanadaŭstva. U adpaviednaści z usimi atrymanymi ad Hienprakuratury zaŭvahami my ŭrehulujem našu pracu da pačatku vydačy dakumientaŭ, praciahniem pracavać nad pravavym statusam i padrychtujem detalovuju pamiatku dla ŭsich atrymalnikaŭ pašpartoŭ Novaj Biełarusi.
Pradstaŭnik BRC, advakat Alfonsas Słuckus raspavioŭ 15min.lt, što ryzyki buduć acenienyja.
«Heta dakumient vielmi farmalnaha źmiestu, i niama čaho tam aceńvać. Viedajučy pra ryzyki, źviazanyja z prajektam, byŭ sfarmavany zapyt, na jaki byŭ dadzieny adkaz. Jon mienavita pra hetyja ryzyki, pakul u dakumiencie nie skazana ničoha novaha, pra što b nie było viadoma. Tamu i robiacca takija zapyty, kab, bačačy ryzyki, možna było prymać adpaviednyja rašeńni pa ich kiravańni», — raspavioŭ jon partału.