Šarenda-Panasiuk pryznałasia, što padpisała papiery ab supracoŭnictvie ź siłavikami i atrymała imia Edelviejs
Aktyvistka zajaviła, što admianiaje hetuju damovu.
Na pres-kanfierencyi 10 lutaha ŭ Vilni Palina Šarenda-Panasiuk raskazała, praź jakija katavańni prajšła padčas źniavoleńnia. Jana skazała, što jaje stratehijaj, kab vyjści z kałonii, stała padpisańnie papiery ab kanfidencyjalnym supracoŭnictvie ź siłavikami. Joj dali mianušku Edelviejs.
Pieršuju papieru jana padpisała 24 śniežnia 2024 hoda ŭ kałonii №24. Druhuju papieru — u Breście, kali pryjšła ŭ HUBAZiK. Heta było 3 lutaha 2025 hoda.
Na nastupny dzień Šarenda-Panasiuk źjechała z krainy.
«Ja zajaŭlaju, što ja pisała hetyja papiery, razumiejučy, što mahu nikoli nie vyjści z-za hetych krataŭ. Z majho boku heta byŭ taktyčny chod», — patłumačyła jana.
Jana publična admianiła damovu i zaklikała inšych palitviaźniaŭ, kamu daviałosia padpisać padobnyja papiery, publična dezavujavać dakumienty.
***
Bresckaja aktyvistka Palina Šarenda-Panasiuk znachodziłasia za kratami sa studzienia 2021 hoda. Pieršasna joj prysudzili dva hady źniavoleńnia.
Žančyna pavinna była vyjści na volu ŭ 2022 hodzie, ale joj trojčy dadavali pa hodu kałonii za «niepadparadkavańnie patrabavańniam administracyi». Jana była pieršaj palitźniavolenaj žančynaj, kaho asudzili pa hetym artykule.
Palinu pieraviali ŭ kałoniju dla recydyvistak, katavali pastajannym znachodžańniem u ŠIZA i pamiaškańni kamiernaha typu. Za čas źniavoleńnia ŭ Paliny pahoršyŭsia stan zdaroŭja, źjaviŭsia chraničny pankreatyt.
Ahułam jana praviała za kratami bolš za 4 hady. 270 sutak Palina praviała ŭ karcarach i ŠYZA.
1 lutaha 2025 hoda Palina Šarenda-Panasiuk vyjšła na volu. Jana vyjechała ź Biełarusi ŭ Litvu, dzie jaje čakali muž i dvoje dziaciej.