Pry spryjańni ZŠA vyzvalili šmatdzietnuju Alenu Maŭšuk — sanitarku balnicy, jakaja na pratestach u Pinsku ŭdaryła kałom pa siłavikach

Žančyna praviała za kratami čatyry z pałovaj hady. Jaje ŭtrymlivali ŭ kałonii dla recydyvistak.

Alena z dačkoj Julijaj. Fota: archiŭ siamji

Alenie Maŭšuk 48 hadoŭ, jana šmatdzietnaja maci. U 2020-m žančyna žyła razam z mužam Siarhiejem i tryma dziećmi ŭ Pinsku: na toj čas adna dačka ŭ jaje była paŭnaletniaja, dźvium inšym było 10 i 5 hadoŭ adpaviedna. Byli jašče dvoje dziaciej, ale Alenu pazbavili baćkoŭskich pravoŭ na ich.

Žančyna pracavała sanitarkaj u pinskaj balnicy i pamočnicaj kuchara ŭ stałoŭcy. Jaje dačka Julija raskazvała ŭ intervju, što raniej u Aleny byli prablemy z ałkaholem. Ale paźniej žančyna ŭziałasia za rozum i paśpieła adnavić pravy na niekatorych ź dziaciej.

Najmienšaja dziaŭčynka — sumiesnaja dačka Aleny i jaje muža Siarhieja.

Alenu ź Siarhiejem zatrymali 10 žniŭnia 2020-ha za ŭdzieł u načnych pratestach u Pinsku. 9 žniŭnia muž z žonkaj vyjšli da harvykankama, kab daviedacca vyniki hałasavańnia, ale zamiest hetaha akazalisia ŭ centry sutyčki z uzbrojenymi siłavikami.

@nashaniva Pry spryjańni ZŠA vyzvalili šmatdzietnuju Alenu Maŭšuk — sanitarku balnicy, jakaja na pratestach u Pinsku ŭdaryła kałom pa siłavikach Niahledziačy na žachi, jakija Alenie daviałosia pieražyć u kałonii, jana vyhladała niazłomlenaj #biełaruś #novostibiełarusi #žyviebiełaruś #naviny #biełorusy #politzaklučiennyje #bčb ♬ Epic - DM Production

Alena padyšła da šarenhi siłavikoŭ i ŭdaryła pa ščytach rukami, draŭlanym kałom i pałkaj.

Padčas zatrymańnia Alenu i Siarhieja źbivali, byli źviestki, što ŭ žančyny źjavilisia prablemy sa słycham. Paźniej jaho adpuścili pad chatni aryšt, a jaje pakinuli za kratami da suda. Nieŭzabavie ź Siarhiejem źviazałasia byłaja sukamiernica jaho žonki, jakaja raskazała, što Alena siadzić za kratami «hołaja, bosaja, źbitaja».

30 krasavika 2021-ha ŭ Breście vynieśli prysud Maŭšukam i jašče 12 fihurantam «pinskaj spravy»: Alenu prysudzili da 6 hadoŭ za kratami, Siarhieja — da 6,5 hadoŭ. Pakul žančyna była ŭ SIZA, jaje 10-hadovuju dačku zabrali ŭ sacyjalny prytułak (paźniej atrymałasia zabrać dzicia adtul). Paśla abviaščeńnia prysudu Alena napisała ŭ sšytku «Ja paviešusia» i pakazała zale.

Alena Maŭšuk paśla vyzvaleńnia z pradstaŭnicaj Abjadnanaha pierachodnaha kabinieta pa sacyjalnaj palitycy Volhaj Zazulinskaj. Fota: Ofis Śviatłany Cichanoŭskaj

Padčas źniavoleńnia Alenu pazbavili baćkoŭskich pravoŭ. Da jaje prymianiali fizičny i psichałahičny hvałt, pazbaŭlali pieradač i spatkańniaŭ ź blizkimi. Pakolki ŭ žančyny była sudzimaść, jana adbyvała termin u kałonii №24 — toj samaj kałonii, jakuju Palina Šarenda-Panasiuk niadaŭna nazvała «žyvadziorniaj».

Alena Maŭšuk paśla vyzvaleńnia. Fota: Ofis Śviatłany Cichanoŭskaj

Ciapier Alena Maŭšuk na voli. Jaje muž zastajecca za kratami.

Kamientary da artykuła