Novy ŭrad Hiermanii rychtujecca da rekordnych vydatkaŭ na vojska
Budučy ŭrad Hiermanii abmiarkoŭvaje maštabnyja inviestycyjnyja pakiety, jakija mohuć pieravysić sotni miljardaŭ jeŭra.
Frydrych Mierc. Fota: Nietfeld / picture alliance via Getty Images
Jak stała viadoma Bild, padčas pieramovaŭ pamiž CHDS/CHSS i Sacyjał-demakratyčnaj partyjaj Hiermanii havorka išła ab stvareńni dvuch fondaŭ: adnaho dla Bundeśviera (uzbrojenych sił), druhoha — dla abnaŭleńnia infrastruktury.
Pavodle infarmacyi Bild, u abodva fondy mohuć unieści «značna bolš za 100 miljardaŭ jeŭra». Viadučyja niamieckija ekanamisty acanili patreby ŭ 400 miljardaŭ jeŭra dla abarony i da 500 miljardaŭ — dla infrastrukturnych prajektaŭ.
Adnačasova abmiarkoŭvajecca mahčymaja reforma «pazykovaha tormazu» — zakona, jaki strymlivaje rost dziarždoŭhu. Lidar CHDS Frydrych Mierc vykazaŭ aściarožnuju hatoŭnaść da źmienaŭ, ale pakul nieviadoma, kali heta moža adbycca. Varyjant reformy da kanca sakavika vyhladaje małaimaviernym, a paśla stvareńnia novaha ŭrada «Alternatyva dla Hiermanii» i «levyja» mohuć zabłakavać inicyjatyvu, jakaja patrabuje dźviuch tracin hałasoŭ u Bundestahu.
Frydrych Mierc maje namier najbližejšym časam asabista sustrecca z prezidentam ZŠA Donaldam Trampam. Miarkujecca, što adnoj z hałoŭnych tem sustrečy stanuć płany ŭrada Hiermanii pa finansavańni abarony krainy.