Tramp padpisaŭ ukaz ab značnych skaračeńniach na «Radyjo Svaboda» i jašče šaści navinavych karparacyjach
Prezident ZŠA Donald Tramp padpisaŭ ukaz, nakiravany na skaračeńnie siami fiederalnych ahienctvaŭ, u tym liku Ahienctva ZŠA pa hłabalnych miedyja (USAGM), paviedamlaje Radyjo Svaboda.
Fota: Bill Pugliano / Getty Images
Ukaz, padpisany poźnim viečaram 14 sakavika, taksama zakranaje ahienctvy, jakija zajmajucca pytańniami biazdomnaści, pracoŭnych sprečak i raźvićcia miascovych supolnaściej.
«Na praciahu 7 dzion z daty padpisańnia hetaha ŭkaza kiraŭnik kožnaj ź pieraličanych [u dakumiencie] dziaržaŭnych ustanoŭ pavinien padać dyrektaru Administracyjna-biudžetnaha ŭpraŭleńnia spravazdaču, jakaja paćviardžaje poŭnaje vykanańnie ŭkaza, a taksama tłumačyć, jakija padraździaleńni abo funkcyi hetaj ustanovy źjaŭlajucca pradpisanymi zakonam i ŭ jakoj stupieni», — havorycca ŭ tekście ŭkaza.
USAGM — heta niezaležnaje dziaržaŭnaje ahienctva ZŠA, jakoje ažyćciaŭlaje viaščańnie navin i infarmacyjnych prahram amal na 50 movach dla aŭdytoryi prykładna 361 miljon čałaviek kožny tydzień.
Biudžetny zapyt USAGM na 2025 finansavy hod skłaŭ 950 miljonaŭ dalaraŭ, što pavinna pakryć usie jaho apieracyjnyja vydatki i kapitalnyja ŭkładańni.
U biudžet uvachodziać miedyjapłatformy:
- Radyjo Svaboda/Radyjo Svabodnaja Jeŭropa (RFE/RL)
- «Hołas Amieryki»
- «Radyjo Svabodnaja Azija»
- Ofis radyjoviaščańnia na Kubu (Radio Martí)
- Blizkaŭschodnija radyjoviaščalnyja sietki (MBN)
- Fond adkrytych technałohij