Tramp abvieściŭ vajnu jemienskim chusitam
Prezident ZŠA daŭ zahad amierykanskim uzbrojenym siłam prystupić da naniasieńnia mahutnych udaraŭ pa jemienskich paŭstancach, jakija teraryzujuć rehijon.
Donald Tramp. Fota: Andrew Harnik/Getty Images
Jaho słovy pieradaje vydańnie BBC News.
«Siońnia ja zahadaŭ Uzbrojenym siłam ZŠA prystupić da rašučych i mahutnych dziejańniaŭ suprać jomienskich terarystaŭ: chusitaŭ», — napisaŭ Tramp u svajoj sacsietcy Truth Social, patłumačyŭšy svajo rašeńnie tym, što chusity nie spyniajuć abstreły amierykanskich i inšych karabloŭ, samalotaŭ i bieśpiłotnikaŭ.
«Paviedamlaju terarystam-chusitam: vaš čas skončyŭsia. Vy pavinny spynić ataki siońnia ž. U advarotnym vypadku vas čakajuć takija piakielnyja muki, jakich vy jašče nie adčuvali», — dadaŭ prezident ZŠA.
«Našy advažnyja vajskoŭcy prosta zaraz nanosiać pavietranyja ŭdary pa bazach terarystaŭ, ich lidarach i supraćrakietnaj abaronie, kab abaranić amierykanskija marskija, pavietranyja i vajenna-marskija aktyvy i adnavić svabodu sudnachodstva», — napisaŭ Tramp.
Jon taksama zaklikaŭ Iran spynić akazańnie padtrymki chusitam. «Nie śmiejcie pahražać amierykanskamu narodu, jaho prezidentu, jaki atrymaŭ adzin z najbujniejšych mandataŭ u historyi prezidenctva, abo suśvietnym sudnachodnym šlacham.
Kali vy heta zrobicie, aścierahajciesia, bo Amieryka prymusić vas całkam adkazać za heta, cyrymonicca my z vami nie budziem», — papiaredziŭ Tramp.
U dačynieńni da Rasii, jakaja viadzie ahresiŭnuju vajnu suprać Ukrainy, Tramp i jaho administracyja prytrymlivajucca zusim inšaj rytoryki.