U źlitaj razmovie siłaviki raskazali, jak šukajuć ludziej pa bazie z SIM-kartami
«Kibierpartyzany» apublikavali zapis razmoŭ troch siłavikoŭ, dzie jany abmiarkoŭvajuć pošuk ludziej, vykarystoŭvajučy dla hetaha fotazdymki i bazu «Majak». Akazvajecca, heta nie tak prosta.
Ilustracyjnaje fota: MUS
«Majak» — baza, jakoj karystajucca siłaviki, dazvalaje adsačyć, dzie znachodziŭsia čałaviek, praź jaho SIM-kartu biełaruskaha mabilnaha apieratara.
U adnoj sa źlitych razmoŭ namieśnik načalnika kryminalnaj milicyi minskaha abłvykankama Ihar Kačałaŭ pytajecca ŭ Juryja Kabakova, namieśnika načalnika Maładziečanskaha RAUS, detali raspačataj spravy za nadpisy «3%» u Chožaŭskim i Haradoŭskim sielskich savietach.
Z dyjałohu vynikaje, što niechta pakinuŭ «3%» na dvuch prypynkach. Ich zaŭvažyŭ čałaviek, jaki jechaŭ mima, i paviedamiŭ siłavikam.
Kačałaŭ upeŭnieny, što pra nadpisy na prypynkach siłaviki daznalisia vielmi apieratyŭna i doŭha jany tam prabyć nie paśpieli, tamu zahadvaje vialiki pramiežak času pa bazie «Majak» nie hladzieć. Kabakoŭ u hetym nie ŭpeŭnieny, ale pahadžajecca.
Kačałaŭ: Pasłuchaj, dyk davaj-ka daručy tady supracoŭnikam, chaj mnie pahladziać hety «Majak» u noč z 9 na 10 i pryviažuć da hetych adrasoŭ. Što ŭ nas atrymlivajecca? Moža tam vyśviecicca zaraz telefon, chtości išoŭ ad adrasa da adrasa, nu, ad prypynku da prypynku. Možam heta zrabić?
Kabakoŭ: Možam, čamu nie možam? Nu, a čaho 9 na 10?
Kačałaŭ: Nu, bo ŭ ciabie napisana 10.05 uzbudžana nie paźniej, čym 15.25 10.05.
U jašče adnoj razmovie Kačałaŭ abmiarkoŭvaje z načalnikam Dziaržynskaha RUUS Jaŭhienam Žylinskim ciažkaści pracy z bazaj «Majak».
Siłaviki źbirajucca zatrymlivać niekalkich ludziej, jakija, pa ich razumieńniu, niešta zrabili, ale nie mohuć upeŭnicca, što heta sapraŭdy jany. Miesca «złačynstva» dakładna ŭ ich ustalavać nie atrymlivajecca:
Žylinski: Fotapastku zaraz płanujem pastavić, ale jany ŭčora, bladź, uziali znak i sfatahrafavalisia, vyradki.
Kačałaŭ: Jany da hetaha ŭ adnym miescy fotkalisia?
— Nu tak, u adnym miescy.
— A my nie vyznačyli?
— Nu prykładna my ŭžo vyznačyli, pa «Majaku» my nie možam, bo ŭ nas dźvie vyški, bla*, i jana pierakryžoŭvajecca, nu i taja, i taja, i taja pracuje. Ciažka, vielmi ciažka.
— A kali tam adzvanić z hetaha miesca, zrabić, tak pahladzieć, jakija tam telefony? Chacia ich tam šmat.
— Nie, nie, tam, bieźlič, tam trasa, bla*, u mianie ž trasa ŭsiudy tam adna, i tam kala trasy hetyja ŭsie.
Kačałaŭ prapanavaŭ Žylinskamu ŭ takim razie pravodzić «śledčyja mierapryjemstvy», naprykład, zasadu, ale toj adkazaŭ, što nie maje stolki ludziej.
«Tym bolš, što ŭ mianie voś raskryćcio troški, tak skažu, da vobłaści nie dahaniaju nichiera», — pryznaŭsia siłavik.
15 sakavika «Kibierpartyzany» apublikavali razmovy siłavikoŭ, dzie tyja sprabavali znajści «niaŭłoŭnaha» aŭtara palityčnych nadpisaŭ na adnym z budynkaŭ u Salihorsku.