Isłandskaja ministarka pa spravach dziaciej pajšła ŭ adstaŭku, bo naradziła ad niepaŭnaletniaha

Ministarka pa spravach dziaciej Isłandyi Astyldur Łoa Torsdocir pajšła ŭ adstaŭku paśla taho, jak pryznałasia, što bolš za 30 hadoŭ tamu naradziła dzicia ad niepaŭnaletniaha. U intervju ŚMI jana skazała, što jany pačali adnosiny, kali chłopcu było 15 hadoŭ, a joj 22, i jana była kansultantkaj u relihijnaj hrupie, jakuju jon naviedvaŭ. Zatym jana naradziła ad taho chłopca dzicia, kali tamu było 16 hadoŭ, a joj 23, piša Bi-bi-si.

Astyldur Łoa Torsdocir. Fota: EVN

«Prajšło 36 hadoŭ, za hety čas šmat što źmianiłasia, i siońnia ja b dakładna vyrašyła hetyja pytańni pa-inšamu», — skazała 58-hadovaja ministarka.

Premjer-ministarka Isłandyi Krystrun Frostadocir paśla taho zajaviła presie, što heta «surjoznaja sprava», ale pry hetym dadała, što viedaje krychu bolš, čym «zvyčajny čałaviek».

«Heta asabistaja sprava, i z pavahi da zacikaŭlenaj asoby ja nie budu kamientavać sutnaść», — skazała jana.

Jak paviedamlaje hazieta Visir, Frostadocir skazała, što atrymała paćviardžeńnie hetaj historyi tolki 20 sakavika ŭviečary. Jana adrazu ž vyklikała ministarku pa spravach dziaciej da siabie, i taja padała ŭ adstaŭku.

Torsdocir zajaviła ŭ intervju, što sustreła baćku dziciaci, jakoha ŭ presie nazyvajuć Ejrykam Asmundsanam, kali jana pracavała ŭ relihijnaj hrupie «Relihija i žyćcio», da jakoj jon, jak paviedamlajecca, dałučyŭsia z-za prablem u siamji. Na momant znajomstva jamu było 15 hadoŭ, a joj 22. U nastupnym hodzie Torsdocir naradziła syna.

Paviedamlajecca, što adnosiny pary byli tajemnymi, ale Asmundsan byŭ pry naradžeńni dziciaci i pravioŭ paśla taho z kachankaj pieršy hod. Adnak situacyja źmianiłasia, kali Torsdocir sustreła svajho ciapierašniaha muža.

Paviedamlajecca, što ŚMI bačyli dakumienty, jakija Asmundsan padaŭ u Ministerstva justycyi Isłandyi z prośbaj atrymać dostup da svajho syna, ale Torsdocir admoviła jamu ŭ hetym, a taksama zapatrabavała — i atrymlivała — ad chłopca alimienty ciaham nastupnych 18 hadoŭ.

Na minułym tydni svajačka Asmundsana dvojčy sprabavała źviazacca z premjer-ministarkaj Isłandyi z nahody hetych adnosin. Frostadocir skazała, što kali hetaja žančyna raspaviała, što heta tyčycca ministra ŭrada, jana paprasiła bolš infarmacyi, što ŭrešcie pryviało da vykryćcia i adstaŭki čynoŭnicy.

U televizijnym intervju isłandskamu ahienctvu RUV Torsdocir skazała, što jana zasmučanaja tym, što hetaja žančyna źviazałasia z premjer-ministarkaj.

«Ja razumieju, jak heta vyhladaje», — skazała jana i dadała, što «ciažka danieści praŭdzivuju historyju ŭ navinach».

Choć uzrost zhody ŭ Isłandyi składaje 15 hadoŭ, zajmacca seksam z čałaviekam va ŭzroście da 18 hadoŭ niezakonna, kali vy jaho nastaŭnik abo nastaŭnica, kali jana finansava zaležyć ad vas ci pracuje na vas. Maksimalnaje pakarańnie za hetaje złačynstva — try hady pazbaŭleńnia voli.

Niahledziačy na adstaŭku z pasady ministarki, Torsdocir zajaviła, što nie płanuje pakidać palityku.

Kamientary da artykuła