U Zasłaŭi źnieśli da Dažynak karčmu i kramu, jakija raniej ličylisia pomnikami architektury
Histaryčnyja budynki pazbavili statusu, kali rychtavalisia da Dnia biełaruskaha piśmienstva.
Reštki źniesienaj u pačatku lutaha kramy ŭ Zasłaŭi. Fota: instahram zaslavl_info
Pavodle infarmacyi telehram-kanała «Spadčyna», za apošnija miesiacy ŭ histaryčnym centry horada byli źniščany dva draŭlanyja budynki pačatku XX stahodździa na rahu Savieckaj i Paštovaj vulic.
Pieršy budynak — kolišniaja krama 1912-1914 hh. pabudovy pa vulicy Savieckaj, 34 — byŭ źniesieny ŭ pačatku lutaha, druhi — kolišniaja karčma 1911-1914 hh. pa Savieckaj, 36 — u aŭtorak, 18 sakavika.
Reštki źniesienaj u pačatku lutaha kramy ŭ Zasłaŭi. Na zadnim fonie karčma. Fota: telehram-kanał «Spadčyna»
Reštki źniesienaj karčmy ŭ Zasłaŭi. Fota: telehram-kanał «Spadčyna»
Začystka histaryčnaj zabudovy adbyvajecca ŭ miežach dobraŭparadkavańnia horada da abłasnych «Dažynak», jakija Zasłaŭje prymie sioleta.
Śviata pracaŭnikoŭ siała ŭžo nie adno dziesiacihodździe kančajecca dla rajcentraŭ adčuvalnymi stratami histaryčnaj zabudovy, jakaja vyhladaje dla čynoŭnikaŭ niedastatkova pryvabna.
Kolišniaja krama pa vulicy Savieckaj, 34 u Zasłaŭi. Na zdymku 2014 hoda na rahu budynka jašče vidać achoŭnuju šyldu. Fota: Hłobus Biełarusi
Kolišniaja karčma pa vulicy Savieckaj, 36 u Zasłaŭi. Na zdymku 2014 hoda na rahu budynka jašče vidać achoŭnuju šyldu. Fota: Hłobus Biełarusi
Miž tym hetyja dva budynki pa Savieckaj vulicy jašče dziesiać hadoŭ tamu aficyjna ličylisia historyka-kulturnymi kaštoŭnaściami. Abodva damy byli ŭklučany byli ŭziaty pad achovu jašče ŭ 1994 hodzie, u Dziaržaŭny śpis pieraniesieny ŭ 2007 hodzie.
Pazbavili ich achoŭnaha statusu ŭ 2014 hodzie, kali horad rychtavali da inšaha śviata, Dnia biełaruskaha piśmienstva.
Karčma i krama pa Savieckaj vulicy ŭ Zasłaŭi pierad znosam. Fota: telehram-kanał «Spadčyna»
Zhodna z Kodeksam ab kultury, pazbavić pomnik statusu možna, kali jon byŭ źniščany abo straciŭ admietnaści, jakija abumovili jamu nadańnie statusu, i niemahčymaje jahonaje navukova abhruntavańnie adnaŭleńnie. Pakolki budynki z 1994 hoda, kali jany atrymali status, nijak nie źmianilisia, a ich vyhlad dobra viadomy, vyklučeńnie sa śpisu vyhladaje niezakonnym.