Kiraŭnicu Hahauzii aryštavali ŭ aeraporcie Kišyniova pry sprobie pakinuć krainu
Kiraŭnica aŭtanomnaha rehijona Hahauzija ŭ składzie Małdovy Jaŭhienija Hucuł była zatrymanaja ŭ aŭtorak supracoŭnikami antykarupcyjnaha ŭpraŭleńnia padčas sproby pakinuć krainu. Jaje zatrymali na 72 hadziny ŭ aeraporcie Kišyniova.
Hetuju infarmacyju paćvierdziła małdaŭskaj słužbie Radyjo Svaboda pres-sakratar Nacyjanalnaha antykarupcyjnaha centra Andžeła Starynski. Pavodle jaje słoŭ, bolš padrabiaznaja infarmacyja budzie pradstaŭlena ŭ sieradu.
U Małdovie suprać Hucuł raspačaty dźvie kryminalnyja spravy: adna — pra niezakonnaje finansavańnie jaje palityčnaj dziejnaści (u tym liku pra ŭvoz hrošaj z Rasii), druhaja — pra ŭdzieł u arhanizacyi pratestaŭ u Kišyniovie ŭ 2022 hodzie. Sama Jaŭhienija Hucuł admaŭlaje svaju datyčnaść da hetych padziej i nazyvaje spravu palityčna matyvavanaj.
Učorašniamu zatrymańniu papiaredničała zajava Antykarupcyjnaj prakuratury Małdovy pra zaviaršeńnie pradstaŭleńnia dokazaŭ u spravie ab niezakonnym finansavańni.
U 2024 hodzie ZŠA i Jeŭrasajuz unieśli Hucuł u svaje sankcyjnyja śpisy. Pavodle ŭładaŭ ES, jana razam ź niekalkimi inšymi hahauzskimi palitykami padryvaje stabilnaść u Małdovie.
Hahauzija — aŭtanomnaja vobłaść Małdovy ź pieravažna ruskamoŭnym nasielnictvam. Rehijon tradycyjna vystupaje za zbližeńnie z Rasijaj i suprać intehracyi Małdovy ŭ Jeŭrapiejski sajuz. Pavodle vynikaŭ refierendumu, jaki adbyŭsia ŭ lutym 2014 hoda, bolš za 98 pracentaŭ udzielnikaŭ vykazalisia za intehracyju Małdovy ŭ Mytny sajuz.