Biełarus za 120 rubloŭ nabyŭ dziciačy sadok i choča zrabić ź jaho sałon pryhažości
Zakinuty viaskovy dziciačy sadok Mikałaj zaŭvažyŭ na aŭkcyjonie, raskazvaje Onliner.
Były dziciačy sadok u Arančycach. Fota: Onliner
Znachodzicca budynak u vioscy Arančycy Pružanskaha rajona. 36-hadovy pradprymalnik Mikałaj raniej sam naviedvaŭ hety dziciačy sadok.
Ciapier z novaj majomaści biełarus choča zrabić prastoru, jakaja mahła b pryciahvać da siabie viaskovuju moładź: kab za pasłuhami pryhažości i zabavami nie treba jechać u Pružany ci Brest.
«Častku pamiaškańniaŭ ja płanuju zdavać u arendu pad cyrulniu i manikiurnych kabiniet, a na pakinutych «kvadratach» chaču arhanizavać pakoj adpačynku i łaźnievy kompleks abo salany pakoj. Pablizu jość zadumki zrabić terasu z basiejnam», — raskazaŭ Mikałaj žurnalistam.
Były dziciačy sadok u Arančycach. Fota: Onliner
Pakupka ŭ 320 kvadratnych mietraŭ terytoryi z tryma budynkami abyšłasia pradprymalniku ŭ 120 rubloŭ. Adnak były dziciačy sadok patrabuje dadatkovych hrošaj na ramont.
Finalnaj sumy, jakuju Mikałaj płanuje zakłaści na renavacyju, niama. Banki ŭ kredycie dla takoj spravy admovili. Entuzijast układvaje hrošy sa svajho biźniesu pa čystcy dyvanoŭ, jaki raspačaŭ u 2018 hodzie.