Vyratavalnaja apieracyja na palihonie ŭ Litvie praciahvajecca. Čamu nie ŭdajecca adkryć luk husieničnaj mašyny?
abnoŭlena
Pošuki čaćviarych źnikłych amierykanskich vajskoŭcaŭ praciahvajucca ŭžo treci dzień. Na miescy zdareńnia — bahnistaja miascovaść, vajskovy palihon, technika ratavalnikaŭ, ciažkaja inžynieryja i hłybokaja vada. Adno z klučavych pytańniaŭ, jakija chvalujuć hramadskaść: kali braniamašynu ŭžo znajšli, čamu dahetul nielha pravieryć, ci jość chtości ŭnutry, piša «Vołna».
Hałoŭnakamandujučy Armii Litvy Rajmandas Vajkšnoras, premjer Hintaŭtas Pałuckas i ministr abarony Davile Šakalenie. Fota z fejsbuka Davile Šakalenie
Bajavaja mašyna, pa paviedamleńniach vajskoŭcaŭ, znachodzicca na hłybini prykładna piaci mietraŭ u bałocie i pastupova padtaplajecca. Jaje navat ź ciažkaściu mohuć namacać mietaličnymi trosami. Padrabiaznaści apieracyi pakul nieviadomyja, ale, vierahodna, mašynu sprabujuć vyciahnuć, a adnačasova bałota asušvajuć i sprabujuć praduchilić pastupovaje zatapleńnie mašyny (jana nie hiermietyčnaja).
Jak paviedamiła ministr abarony Davile Šakalenie, za apošnija sutki ŭ bałocie byŭ prakładzieny šlach dla ciažkaj techniki. Ciapier zadača — spynić pastupleńnie vady i zabiaśpiečyć dostup da broniemašyny. Kali heta nie atrymajecca, apieracyja moža zaciahnucca — mahčyma, spatrebicca ŭstanoŭka palaŭ prama ŭ vadajom.
Šakalenie padkreśliła, što ź siemjami źnikłych vajskoŭcaŭ padtrymlivajecca pastajannaja suviaź. Pavodle jaje, vajskoŭcy znachodzilisia ŭ Litvie kala dvuch miesiacaŭ.
Kamitet pa nacbiaśpiecy i abaronie Siejma taksama paćvierdziŭ: bajavaja mašyna sapraŭdy znojdziena, ale dokazaŭ hibieli vajskoŭcaŭ pa-raniejšamu niama. Litoŭskaja armija praciahvaje pošukava-vyratavalnyja dziejańni.
Ministr taksama dadała, što pablizu miesca zatapleńnia prachodzić hazapravod — jaho biaśpieku zaraz praviarajuć.