Kiraŭnik MZS Polščy abmiarkoŭvaŭ u Vašynhtonie vyzvaleńnie žurnalista Andžeja Pačobuta
Kiraŭnik Ministerstva zamiežnych spraŭ Polščy Radasłaŭ Sikorski paviedamiŭ, što padčas apošniaha vizitu ŭ Vašynhton abmiarkoŭvaŭ vyzvaleńnie biełaruskaha žurnalista i aktyvista polskaha pachodžańnia Andžeja Pačobuta, piša Most sa spasyłkaj na Wp.pl.
Andžej Pačobut. Fota: sb.by
Jon nie raskryŭ padrabiaznaściaŭ, adznačyŭšy, što detali pavinny zastavacca kanfidencyjalnymi.
— Kali b heta zaležała ad mianie, viadoma, Andžej Pačobut byŭ by na svabodzie, ale, na žal, jon znachodzicca va ŭładzie aŭtarytarnaha režymu, — skazaŭ Sikorski.
Sikorski naviedvaŭ Vašynhton jašče 21—25 lutaha 2025 hoda. Tady jon sustrakaŭsia ź dziaržsakratarom ZŠA Marka Rubia. Jany abmiarkoŭvali, u pryvatnaści, situacyju va Ukrainie i transatłantyčnyja adnosiny.
25 sakavika hetaha hoda spoŭniłasia čatyry hady z momantu aryštu Andžeja Pačobuta. Praz dva hady, u lutym 2023 hoda, jaho asudzili na vosiem hadoŭ za nibyta raspalvańnie nacyjanalnaj varožaści, reabilitacyju nacyzmu i zakliki da sankcyj.
Pavodle danych pravaabaroncaŭ, u 2025 hodzie palitviaźniu praciahnuli na paŭhoda režym PKT — pamiaškańnia kamiernaha typu, dzie ŭstalavany bolš strohi režym utrymańnia.