U Šakucina zabrali harotny daŭhabud «Šanter Chił» kala Drazdoŭ
Jak stała viadoma «Našaj Nivie», kolišni miljanier Alaksandr Šakucin straciŭ nie tolki «Amkador», ale i toje, u što ŭkładvaŭ usie prybytki ad dziejnaści — svoj znakamity daŭhabud na praśpiekcie Pieramožcaŭ.
«Naša Niva» paviedamlała, što ŭ pačatku 2025 hoda Alaksandr Łukašenka nacyjanalizavaŭ šmatmiljonnyja daŭhi svajho tavaryša Alaksandra Šakucina — pieravioŭšy «Amkador» na bałans BiełAZa.
Čytajcie: Łukašenka nacyjanalizavaŭ «Amkador». Šakucin staŭ prostym biełaruskim piensijanieram
Zastavaŭsia niajasnym los «Šanter Chiła» — hihanckaha, u 140 tysiač kvadrataŭ, kompleksa na praśpiekcie Pieramožcaŭ, kala Drazdoŭ.
«Šanter Chił». Fota: realt.onliner.by
Dla jaho ŭźviadzieńnia Šakucin zalez u kitajski kredyt na 120 miljonaŭ dalaraŭ, ale tak i nie zdoleŭ skončyć budaŭnictva, paralelna źniakroviŭšy i svoj asnoŭny mašynabudaŭničy biźnies.
Jak ciapier stanovicca viadoma, budynak «Šanter Chiła» i ziamla pad im taksama bolš nie naležyć kampanijam Alaksandra Šakucina.
Chto staŭ novym ułaśnikam i na jakich umovach — pakul nieviadoma.