Vienhryja abviaściła pra vychad ź jurysdykcyi Mižnarodnaha kryminalnaha suda
Vienhryja maje namier vyjści ź jurysdykcyi Mižnarodnaha kryminalnaha suda (MKS). Takoje paviedamleńnie zrabiŭ u sieradu, 3 krasavika, kiraŭnik administracyi premjer-ministra Vienhryi Hierhiel Hujaš, piša Deutsche Welle.
Bińjamin Nietańjachu i ministr zamiežnych spraŭ Vienhryi Kryštaf Sałaj-Babraŭnicki. Fota z fejsbuku Kryštafa Sałaj-Babraŭnickaha
«Vienhryja vychodzić ź Mižnarodnaha kryminalnaha suda. U čaćvier (3 krasavika) urad pačnie praces vychadu ŭ adpaviednaści z kanstytucyjnymi normami i pałažeńniami mižnarodnaha prava», — napisaŭ jon. Adznačajecca, što hety krok Budapiešt robić na fonie vizitu ŭ Vienhryju premjer-ministra Izraila Bińjamina Nietańjachu, u dačynieńni da jakoha dziejničaje ordar na aryšt, vydadzieny MKS.
21 listapada 2024 hoda MKS vydaŭ ordary na aryšt Nietańjachu i byłoha ministra abarony Izraila Joava Hałanta za dziejańni izrailskich vajskoŭcaŭ u siektary Haza. Premjer-ministr Vienhryi Viktar Orban tady rezka asudziŭ hety krok i paabiacaŭ zaprasić Nietańjachu ŭ Budapiešt, praihnaravaŭšy patrabavańnie Haahi.
1 krasavika vienhierskaja słužba Radyjo Svaboda paviedamiła sa spasyłkaj na kiraŭnika Miniusta Vienhryi Bience Tužona, što Budapiešt apaviaściŭ zamiežnych dypłamataŭ pra vychad z MKS. Uvieś praces moža zaniać da hoda, padličyli žurnalisty. Vienhryja padpisała Rymski statut ab MUS u 2001 hodzie.