Biełaruska raspačała čelendž: vydatkoŭvać na ježu tolki $20 na miesiac. Što atrymałasia?
Iryna pastaviła sabie metu: vydatkoŭvać na ježu nie bolš za 20 dalaraŭ (ci 62 biełaruskija rubli) na miesiac. Takim čynam žančyna płanuje zabić adrazu dvuch zajcaŭ: ekanomić, a taksama žyć na deficycie kałoryj, kab schudnieć.
Iryna. Fota: skrynšot z tyktoka @Irina_60_k
Pry hetym biełaruska amal štodzionna vykładvaje svoj racyjon ŭ tyktoku, demanstrujučy, što jaje deficyt kałoryj (1200-1300 kałoryj u dzień) — heta nie pra isnavańnie vyklučna na chlebie i vadzie.
Tak, u dni, kali Iryna nie pracuje ŭ aharodzie i, adpaviedna, tracić mienš kałoryj, jaje dzionnaje charčavańnie vyhladaje nastupnym čynam: hrečka z katletaj, sałataj i kava biez cukru na śniadańnie, sup z kisłaj kapustaj na abied i kavałak piraha z načyńniem ź miasa i cybuli na viačeru.
Časam zamiest paŭnavartasnaha pryjomu ježy žančyna moža źjeści maroziva.
«Praviła majoj dyjety — jeści toje, što ja lublu, tolki ŭ mienšych abjomach. U marozivie 240 kałoryj, heta navat mienš za maju normu kałoryj na abied», — tłumačyć Iryna.
U kancy sakavika žančyna jakraz padbiła svaje miesiačnyja raschody na ježu. Što ž atrymałasia ŭ chodzie jaje ekśpierymientu? Zakupałasia Iryna ŭ kramach «Marcin», «Skryžavańnie», «Chit», «Hrošyk», «Śvietłafor». Ź lutaha pa sakavik na pradukty ŭ jaje pajšło amal 89 rubloŭ, što bolš za zapłanavany biudžet ažno na 27 rubloŭ. Ale babrujčanka padkreślivaje: častka praduktaŭ u jaje zastałasia na krasavik.
«Ja paličyła ŭsie pradukty, jakija ŭ mianie zastalisia na 1 krasavika, ich vyjšła na 32 rubli. A značyć metu, jakuju ja staviła pierad saboj, ja vykanała, navat sekanomiła try dalary. Tamu ŭ krasaviku ja budu praciahvać žyć na 20 dalaraŭ na miesiac».
Varta adznačyć, što dadatkova ekanomić joj dapamahajuć chatnija zahatoŭki, a taksama časam — vizity dziaciej, jakija prychodziać u hości ź niejkimi smakotkami da stała.
U kamientarach niekatoryja ziemlaki nie razumiejuć, navošta tak pakutavać, i navat pišuć, što žyćcio na takija hrošy, u deficycie — heta nie žyćcio.
«Pastaŭcie pierad saboj metu być ščaślivaj! Heta lepšy prajekt», — rajać kamientatary. Ale Iryna adrazaje: jakraz pa vinie daradcaŭ, jakija kazali joj «žyviom adzin raz, tamu ni ŭ čym sabie nie admaŭlaj», jana za apošnija hady nabrała lišnija kiłahramy i pačała adčuvać siabie horš fizična. Tamu dyscyplina, na jaje dumku, jakraz i jość hruntam ščaślivaha žyćcia.
Za try miesiacy žančyna skinuła vosiem kiłahramaŭ.
Čytajcie taksama:
«Na rozdum dali paŭhadziny». Nastaŭnicy z Połacka daviałosia zvolnicca z-za tyktok-błoha
«Chadžu prykładna 13-14 kiłamietraŭ štodzień». Dzikavicki raskazaŭ, jak schudnieŭ na 35 kiłahramaŭ