U Litvie chočuć praviarać na palihrafie inšaziemcaŭ, jakija mohuć składać pahrozu nacbiaśpiecy
Urad Litvy ŭchvaliŭ prapanovu praviarać na palihrafie inšaziemcaŭ, jakija mohuć składać pahrozu nacbiaśpiecy. Heta moža zakranuć i biełarusaŭ.
Ułady Litvy chočuć praviarać na palihrafie zamiežnikaŭ, jakija patencyjna mohuć pahražać nacyjanalnaj biaśpiecy. Prapanovu ŭžo ŭchvaliŭ ŭrad, ciapier słova za parłamientam.
U novy śpis, akramia inšaziemcaŭ, uvojduć pradstaŭniki pradpryjemstvaŭ, a taksama asobnyja ludzi, jakija žadajuć stać sakretnymi supracoŭnikami raźviedki, piša LRT.
Inicyjataram prapanovy stała litoŭskaja raźviedka, a dakumient na razhlad vyniesła Ministerstva abarony.
Ciapier asoby, jakija pracujuć abo pretendujuć na pracu z sakretnaj infarmacyjaj, ale nie źjaŭlajucca dziaržaŭnymi słužboŭcami, vajskoŭcami, słužbovymi asobami ci rabotnikami viedamstvaŭ i ŭstanoŭ, nie mohuć być pravieranyja na detektary chłuśni.
Ideja ŭ tym, kab dazvolić pravierku lubych asob, jakija chočuć stać sakretnymi supracoŭnikami raźviedki, a taksama inšaziemcaŭ, jakija patencyjna składajuć pahrozu nacyjanalnaj biaśpiecy.
Pracavać usio budzie tak: Departamient dziaržaŭnaj biaśpieki (DDB) daje acenku pahrozy, jakuju składaje inšaziemiec dla dziaržaŭnaj biaśpieki, i padaje zaklučeńni i infarmacyju Departamientu mihracyi. Kali inšaziemiec vykliča ŭ DDB padazreńnie, to jamu budzie prapanavana prajści pravierku na palihrafie.
Prapanova praduhledžvaje, što kali čałaviek admaŭlajecca prajści test na palihrafie, to dazvoł na pracu abo dostup da sakretnaj infarmacyi jamu nie vydajecca abo anulujecca. Kali pravierku prachodzić inšaziemiec, robicca vysnova pra toje, što heta asoba składaje pahrozu dla biaśpieki dziaržavy.
Zhodna ź dziejnym zakanadaŭstvam, pravierku na palihrafie mohuć pravodzić pravaachoŭnyja orhany, vajskovaja raźviedka, DDB i Słužba śpiecyjalnych rasśledavańniaŭ.
U 2024 hodzie litoŭskija ŭłady pryznali 598 hramadzian Biełarusi pahrozaj dla nacyjanalnaj biaśpieki. 179 biełarusam admovili ŭ vydačy DNŽ, 232 — nie praciahnuli dziejańnie hetaha dakumienta. Dazvoły na žycharstva byli skasavanyja dla 175 biełarusaŭ. Jašče trom nie vydali pastajanny dazvoł na žycharstva, dzieviaciarych pazbavili hetaha dakumienta.
Siarod pryčyn, pa jakich biełarusaŭ pryznajuć pahrozaj — słužba ŭ biełaruskaj armii abo milicyi ŭ minułym, a taksama praca na stratehičnych pradpryjemstvach, naprykład, na BiełAES.