9 tysiač knih z ruk u ruki: u ZŠA sotni čałaviek stvaryli «žyvy łancuh», kab dapamahčy kniharni ź pierajezdam
U akcyi ŭziali ŭdzieł 300 čałaviek.
Žychary nievialikaha miastečka Čełsi ŭ ZŠA ŭtvaryli «žyvy łancuh», kab dapamahčy miascovaj kniharni pieranieści na novuju łakacyju bolš za dzieviać tysiač knih.
Udzielniki stali ŭ dva šerahi ŭzdoŭž chodnikaŭ u centry horada. «Łancuh» pačynaŭsia kala staroj łakacyi i zakančvaŭsia kala novaha miesca, kudy vyrašyła pierajechać kniharnia.
Ludzi pa čarzie pieradavali knihi adzin adnamu i stavili ich na palicy ŭ novym mahazinie pavodle ałfavitu. Jak heta adbyvałasia — pakazali na staroncy kniharni ŭ Instagram.
«Vielmi šmat ludziej chacieli dapamahčy. Heta byŭ zručny sposab pieramiaścić knihi. A jašče — mahčymaść dla kožnaha ŭziać udzieł», — adznačyła ŭładalnica kniharni Mišel Taplin.
Pavodle jaje słoŭ, uvieś praces zaniaŭ krychu mienš za dźvie hadziny. Žančyna kaža, što najmańnie transpartnaj kampanii dla ŭpakoŭki i raspakoŭki tysiač knih zaniało b značna bolš času.
Novuju kniharniu płanujuć adkryć na praciahu nastupnych dvuch tydniaŭ.
Ahułam u Čełsi pražyvaje 5300 čałaviek.