Adkul u Biełaruś jedzie bolš za ŭsio hastarbajtaraŭ? Top-20 krain — i Pakistana tut pakul niama
Słovy Alaksandra Łukašenki pra mahčymy pryjezd 150 tysiač pracoŭnych mihrantaŭ vyklikali rozhałas u hramadstvie. Biełarusy aktyŭna vykazvajucca ŭ sacsietkach, zapisvajuć aburanyja tyktoki ź pieražyvańniami nakont «panajeduć». Prapahandysty kinulisia supakojvać ludziej. Ale jakaja ŭvohule ŭ Biełarusi situacyja z zamiežnikami? Raznastajnaj statystyki šmat, pasprabujem vyłučyć samaje cikavaje.
Kolki ŭ Biełarusi zamiežnikaŭ?
Pa stanie na pačatak 2024 hoda ŭ Biełarusi naličvałasia kala 217 tysiač zamiežnikaŭ z časovym ci pastajannym dazvołam na žycharstva. Heta ŭsiaho kala 2,3% ad nasielnictva krainy.
Pryčym hod za hodam ličba pavolna skaračałasia. Naprykład, u 2018-m było kala 223 tysiač čałaviek, u 2021 — kala 221 tysiačy čałaviek.
Bolšaść z hetych ludziej (kala 80%) majuć pastajanny dazvoł na žycharstva, to-bok znachodziacca ŭ Biełarusi davoli daŭno i całkam intehravanyja ŭ hramadstva.
Zamiežnyja studenty i pracoŭnyja mihranty atrymlivajuć časovy dazvoł na žycharstva.
Dakładnaja aktualnaja statystyka pa tym, hramadzianie jakich krain pastajanna žyvuć u Biełarusi, nie publikujecca, ale abryvistyja źviestki pieryjadyčna ahučvajucca. Vidavočna, što najbolšaja kolkaść — rasijanie. Pasoł Rasii ŭ Biełarusi Barys Hryzłoŭ kazaŭ pra 100 tysiač rasijan z dazvołam na žycharstva. Što da ŭkraincaŭ, to ŭ 2022 hodzie ich było bolš za 30 tysiač.
Miarkujučy pa ŭskosnych prykmietach — naprykład, kolkaść złačynstvaŭ, ździejśnienych zamiežnikami — uśled za rasijanami i ŭkraincami pa kolkaści iduć turkmieny.
Chto z zamiežnikaŭ vučycca ŭ Biełarusi?
Kolkaść zamiežnych studentaŭ u Biełarusi trymajecca na ŭzroŭni kala 20 tysiač čałaviek. Za apošnija hady adbylisia istotnyja źmieny — turkmienaŭ stała istotna mienš, a voś kitajcy pryjazdžajuć čaściej.
Pakul nie vidać, kab ułady na miždziaržaŭnym uzroŭni damaŭlalisia na masavy zajezd zamiežnych studentaŭ. Možna zaŭvažyć tolki roŭny pryrost kolkaści studentaŭ z Šry-Łanki, adnak ich kolkaść usio adno nievialikaja.
Kolki pracoŭnych mihrantaŭ?
Najbolšuju kolkaść pretenzij u sacsietkach možna pačuć mienavita da hastarbajtaraŭ — mihrantaŭ, jakija mohuć adbirać u biełarusaŭ pracoŭnyja miescy.
Praz demahrafičny kryzis u krainie ŭłady istotna spraścili praviły pryjomu zamiežnikaŭ na pracu. Ciapier faktyčna dastatkova prosta paviedamić orhanam mihracyi pra padpisanuju pracoŭnuju damovu.
Za košt hetaha kolkaść zamiežnych rabotnikaŭ rezka pavaliła ŭharu.
U 2023 hodzie na pracu ŭ Biełaruś pryjechała 13 tysiač hastarbajtaraŭ, a ŭ 2024 hodzie — 34 tysiačy.
Za pieršy kvartał 2025 hoda dadałosia jašče 12 500 čałaviek. Kali zamiežniki praciahnuć pryjazdžać takimi ž tempami, budzie ŭstanoŭleny novy rekord.
Ahułam ža, pa milicejskich padlikach, zaraz u Biełarusi znachodzicca kala 60 tysiač pracoŭnych mihrantaŭ.
Adkul jeduć pracoŭnyja mihranty?
Jašče ŭ 2023 hodzie bolš za ŭsio pryjazdžała rabotnikaŭ z Rasii. Adnak paśla źmieny mihracyjnaha zakanadaŭstva ŭ našu krainu stała pryjazdžać usio bolš hramadzian Turkmienistana.
U 2023 hodzie ich pryjechała 2087 čałaviek, u 2024-m — 16310 čałaviek, u 2025-m tempy pryrostu jašče vyšejšyja.
Voś statystyka taho, hramadzianie jakich krain pryjechali na pracu ŭ Biełaruś u studzieni-sakaviku 2025 hoda.
- Turkmienistan — 6278 čałaviek
- Uźbiekistan — 1147
- Kitaj — 1121
- Rasija — 1086
- Ukraina — 1052
- Tadžykistan — 193
- Azierbajdžan — 186
- Kazachstan — 131
- Turcyja — 87
- Niepał — 87
- Indyja — 82
- Vjetnam — 71
- Kamierun — 71
- Iran — 60
- Nihieryja — 57
- Małdova — 56
- Armienija — 55
- Kyrhyzstan — 46
- Hruzija — 42
- Jehipiet — 42
Kožny druhi mihrant, jaki pryjechaŭ ad pačatku hoda — turkmien. Uźbieki, kitajcy, rasijanie i ŭkraincy znachodziacca prykładna na adnym uzroŭni, ź vialikim adryvam ad inšych.
A voś pakistancaŭ pakul minimum, usiaho 31 čałaviek ad pačatku hoda. Zrešty, i ŭ minułym hodzie ich było niašmat — 36 čałaviek.
Naturalna, kali virtualnyja płany Alaksandra Łukašenki, ahučanyja paśla sustrečy z kiraŭnikom Pakistana, realizujucca choć častkova, to heta moža istotna źmianić rynak pracoŭnaj siły Biełarusi. Pakul ža havorka moža iści chiba što pra dyspraporcyju na karyść hramadzian Turkmienistana.
Jakija prafiesii samyja papularnyja?
Jak i ŭ bolšaści krain śvietu, mihranty vykonvajuć fizičnuju nizkaapłatnuju pracu, jakaja ŭ mienšaj miery cikavić miascovaje nasielnictva.
Z tych, chto pryjechaŭ na pracu ŭ Biełaruś u 2025-m, samymi papularnymi nastupnyja śpiecyjalnaści:
- Kuchar — 1299 čałaviek
- Kiroŭca — 1073
- Bietonščyk — 669
- Ślesar miechanazboračnych rabot — 667
- Mular — 613
- Ciaślar — 549
- Tynkoŭščyk — 581
- Elektrahazazvaščyk — 332