Varšaŭskuju «Lehiju» moža ŭznačalić biełaruski trenier

Biełaruski trenier Alaksiej Špileŭski, jaki apošnija hady pracuje na Kipry i dabiŭsia ź miascovaj kamandaj dobrych pośpiechaŭ — adzin z hałoŭnych kandydataŭ na pasadu hałoŭnaha treniera varšaŭskaj «Lehii», adnaho z samych tytułavanych futbolnych kłubaŭ Polščy, piša Most.

Viadomy kłub z Varšavy ciapier znachodzicca ŭ stadyi pierabudovy: niadaŭna ŭ im pryznačany novy spartyŭny dyrektar, a ciapier havorka moža iści pra źmienu hałoŭnaha treniera.

Pavodle infarmacyi vydańnia TVP Sport, surjoznym pretendentam na pracu ŭ Varšavie staŭ biełaruski trenier Alaksiej Špileŭski, jaki moža ŭznačalić «Lehiju» ŭžo ŭ nastupnym siezonie.

Imia biełarusa dobra viadomaje ŭ Polščy. Raniej «Lehija» ŭžo prajaŭlała cikavaść da 37-hadovaha śpiecyjalista, pryčym varšaŭski kłub byŭ nie adzinym polskim kłubam, jaki razhladaŭ Špileŭskaha, — cikavaść prajaŭlali taksama «Lech» (Poznań) i «Rakaŭ» (Čenstachova).

Špileŭski ciapier treniruje «Arys» z kiprskaha «Limasoła», ź jakim jon vyjhraŭ čempijanat krainy i vystupaŭ u jeŭrakubkach. Jahony kantrakt z kłubam dziejničaje da 2026 hoda, adnak baki ŭžo damovilisia pra toje, što trenier jaho pakinie paśla zaviaršeńnia biahučaha siezona.

«My byli ździŭlenyja rašeńniem treniera, ale pryniali jaho. Nakolki nam viadoma, jon atrymaŭ prapanovu z-za miažy», — prakamientavali ŭ pres-słužbie kłuba.

Sam Špileŭski paćvierdziŭ, što nie płanuje zastavacca na Kipry: «Moj nastupny kłub dakładna budzie za miežami Kipra. Mnie važna ŭličvać i spartyŭny, i siamiejny bok», — adznačyŭ trenier.

Špileŭski bolšuju častku žyćcia pravioŭ u Hiermanii, dzie pracavaŭ u sistemie «Štutharta» i «Red Buł» (Lajpcyh), a taksama treniravaŭ kamandy ŭ Biełarusi, Kazachstanie i Hiermanii.

Z 2022 hoda jon uznačalvaje «Arys» — za hety čas kamanda stabilna vystupała ŭ čempijanacie Kipra i jeŭrakubkach, a sam trenier zarabiŭ reputacyju sučasnaha i taktyčna hnutkaha śpiecyjalista. Taksama paviedamlajecca, što cikavaść da treniera prajaŭlaje i maskoŭskaje «Dynama».

Pakul ža «Arys» praciahvaje baraćbu za čempijonstva: kamanda zajmaje druhoje miesca i sastupaje kłubu «Pafas» čatyry bały.

Kamientary da artykuła