Adnu z najvialikšych sinahoh Biełarusi pradajuć u Kobrynie

Budynak, jaki źjaŭlajecca historyka-kulturnaj kaštoŭnaściu nacyjanalnaha značeńnia, pradajecca za daŭhi skandalna viadomaha zabudoŭščyka.

Kobrynskaja sinahoha. Fota: e-auction.by

Budynak vystaviła na prodaž «BiełJurZabieśpiačeńnie». Elektronnyja tarhi pryznačanyja na 15 maja, pryjom zajavak — da 14 maja. Pačatkovy košt abjekta składaje 612 tysiač rubloŭ (prykładna 200 tysiač dalaraŭ).

Budynak byłoj sinahohi raźmieščany na vulicy Pieršamajskaj, 40. Hetaja vulica da Druhoj suśvietnaj vajny nazyvałasia Pinskaj vulicaj, a jaŭrejskaja škoła na joj zhadvajecca ŭžo ŭ 1563 hodzie.

Kobrynskaja sinahoha. Fota: e-auction.by

Ciapierašniaja muravanaja sinahoha była ŭźviedziena ŭ siaredzinie XIX stahodździa, pa niekatorych źviestkach u 1840-ch hadach. Sinahoha była pabudavana na vialikim učastku pamiž rakoj Kobrynkaj, vulicaj Pinskaj, haradskimi łaźniami i ŭčastkam Frankoŭskaha. Pa architekturnaj kampazicyi heta bazilikalny chram bieź viežaŭ, z dvuchschilnym dacham, aryjentavany z zachadu na ŭschod. 

U śpisie za 1853 hod jana paznačana jak «niezavieršanaja budaŭnictvam», a pobač ź joj dziejničała jašče dzieviać malitoŭnych škoł. Da 1913 hoda sinahoha dziejničała. Paźniejšyja dakumienty ab jaje funkcyjanavańni adsutničajuć.

Kobrynskaja sinahoha. Fota: e-auction.by

Kobrynskaja sinahoha. Fota: e-auction.by

U čas Druhoj suśvietnaj vajny budynak staŭ centram hieta, kudy nacysty sahnali jaŭrejskaje nasielnictva z usioj akruhi. Paśla vajny sinahoha ŭžo nie vykarystoŭvałasia jak relihijny abjekt: kaštoŭnyja rečy byli vyviezienyja, budynak prystasavali pad vytvorčyja patreby.

Kobrynskaja sinahoha ŭ 1949 hodzie. Fota: Wikimedia Commons

U 1980-ch hadach tut raźmiaščaŭsia cech pa vytvorčaści piva i biezałkaholnych napojaŭ Kobrynskaha kansiervavaha zavoda. U 1990-ja hady budynak pačaŭ zaniepadać.

Płany adnavić sinahohu jak kulturny centr jaŭrejstva Zachodniaj Biełarusi i muziej historyi i etnahrafii jaŭrejaŭ Brestčyny nie byli realizavanyja.

Kobrynskaja sinahoha. Fota: e-auction.by

Kobrynskaja sinahoha. Fota: e-auction.by

Interjery Kobrynskaj sinahohi. Fota: e-auction.by

Sinahoha za daŭhi

Ciapier sinahoha pradajecca za daŭhi «Žyłbudkamplekta», zabudoŭščyka, jaki prasłaviŭsia tym, što tam i nie dabudavaŭ žyły kompleks «Hrušaŭski pasad» u Minsku. 430 dolščykaŭ pieradali kampanii bolš za 58 miljonaŭ rubloŭ, ale kvatery tak i nie atrymali. U vyniku dziaržaŭny zabudoŭščyk zaviaršyŭ budaŭnictva, a kiraŭniki «Žyłbudkamplekta» byli asudžanyja.

Hetaja historyja ŭskładaje na novaha ŭłaśnika histaryčnaha pomnika šerah abciažarvańniaŭ: jon znachodzicca pad aryštam i na jaho raspaŭsiudžvajecca zabarona na rehistracyjnyja dziejańni.

Razam z budynkam pradajuć i ziamielny ŭčastak płoščaj 57 sotak, jaki pieradajecca na pravie pastajannaha karystańnia. Ziamlu možna vykarystoŭvać vyklučna dla raźmiaščeńnia abjektaŭ relihijnaha (kultavaha) pryznačeńnia.

Kamientary da artykuła