Kruty anansavaŭ pierachod u padliku achviar Druhoj suśvietnaj u Biełarusi ad «kožnaha treciaha» da «kožnaha druhoha»

Kiraŭnik administracyi Łukašenki Dźmitryj Kruty na cyrymonii ŭskładańnia viankoŭ da manumienta Pieramohi ŭ Minsku 9 maja padzialiŭsia źviestkami pra «vielizarnuju pracu» Hienieralnaj prakuratury pa vyjaŭleńni ŭ Biełarusi ŭsio novych achviar Druhoj suśvietnaj vajny. Pry hetym jon anansavaŭ, što praź niejki čas acenka strat moža pačać vieścisia pa-novamu. 

Dźmitryj Kruty (čaćviorty źleva) uskładaje kvietki da manumienta Pieramohi ŭ Minsku. 9 maja 2025 hoda

Pavodle słoŭ Krutoha, dyrektar Nacyjanalnaj biblijateki Vadzim Hihin niadaŭna kazaŭ, što kala 1,5 miljona dakumientaŭ, pryśviečanych vajnie, dahetul zachoŭvajucca ŭ archivach i nie razabranyja. Tamu nas, maŭlaŭ, čakaje jašče šmat roznych adkryćciaŭ. Tym bolš što, jak jon śćviardžaje:

«Navat tyja fakty, jakija, zdavałasia b, dobra viadomyja i adlustravany ŭ školnych padručnikach i inšych materyjałach, praciahvajuć abrastać novymi padrabiaznaściami. Hienieralnaja prakuratura viadzie ŭ hetym kirunku vielizarnuju pracu. Ź niadaŭniaha — heta novyja pachavańni i vyjaŭleńnie trahičnych abstavinaŭ, źviazanych z padziejami vajny».

Kali tempy, uziatyja prakuraturaj, zachavajucca nadalej, to na praciahu najbližejšych 5-10 hadoŭ, jak spadziajecca Kruty, adkryjecca šmat novaha pra vajnu, u tym liku budzie ŭzrastać aficyjnaja ličba paniesienych achviar:

«Prezident niezdarma ŭ svaim vystupleńni adznačyŭ, što siońnia my havorym «kožny treci», a nie «kožny čaćviorty», jak ličyłasia raniej. Ale bajusia, jak by da stahodździa Vialikaj Pieramohi my nie pačali kazać užo pra «kožny druhi» — akreśliŭ budučyja pierśpiektyvy Dźmitryj Kruty. 

Kamientary da artykuła