Łukašenka abaviazaŭ najmalnikaŭ całkam kantralavać žyćcio rabotnikaŭ-zamiežnikaŭ — až da taho, ci paradak u kvatery
Alaksandr Łukašenka padpisaŭ ukaz «Ab pavyšeńni roli najmalnikaŭ u halinie źniešniaj pracoŭnaj mihracyi».
Zdymak ilustracyjny. Fota: unctad.org
Dakumient abaviazvaje najmalnikaŭ tatalna kantralavać zamiežnikaŭ, jakich jany ŭziali na pracu. Heta nie datyčycca mihrantaŭ z krain JEAES — Armienii, Kazachstana, Kyrhyzstana i Rasii.
Ciapier pradpryjemstva, jakoje zaprašaje zamiežnika, abaviazana zaklučyć ź im pracoŭnuju damovu na praciahu 30 dzion z daty ŭjezdu rabotnika ŭ Biełaruś, albo ŭ toj ža termin z momantu atrymańnia dazvołu na pracu.
Najmalnik ciapier abaviazany kantralavać svajho rabotnika-zamiežnika. Jon pavinien pryznačyć śpiecyjalnaha čałavieka, jaki budzie sačyć za tym, jak mihrant pracuje, a taksama jak jon vykonvaje praviły i zakony.
U pryvatnaści, takaja adkaznaja asoba pavinna budzie sačyć, ci žyvie zamiežnik pa miescy rehistracyi, ci ŭ paradku ŭ jaho kvatera, ci nie parušaje mihrant praviły pražyvańnia i ci sočyć za terminami dziejańnia dakumientaŭ.
Pravy i abaviazki, a taksama słužbovuju instrukcyju da zamiežnikaŭ treba budzie davodzić na zrazumiełaj im movie.
Taksama dla niekatorych śpiecyjalnaściaŭ urad uviadzie abaviazkovaje viedańnie ruskaj abo biełaruskaj movy. Praviarać uzrovień viedaŭ pavinien budzie taksama najmalnik. Kali viedaŭ niedastatkova, to mihranta na takuju pasadu nie voźmuć.
U vypadku parušeńnia svaich abaviazkaŭ najmalnika buduć karać. Ukaz taksama zabaraniaje časovy pieravod zamiežnika ŭ inšuju kampaniju.
Rabotniki-mihranty pavinny buduć vykonvać zakony, žyć pa miescy rehistracyi, vykonvać praviły karystańnia žyłym pamiaškańniem. Za parušeńni kantrakt z zamiežnikam buduć skasoŭvać.