Erdahan zapuściŭ prahramu pa masavaj praviercy vahi hramadzian na vulicach
Prezident Turcyi Redžep Taip Erdahan pačaŭ maštabnuju kampaniju suprać atłuścieńnia — ciapier hramadzian mohuć publična ŭzvažvać prosta na vulicach. Niekatoryja ličać hetuju inicyjatyvu aŭtarytarnaj i prynižalnaj.
Fota: @BILD_Russian / Telegram
Erdahan inicyjavaŭ maštabnuju kampaniju pa baraćbie z atłuścieńniem, jakaja ŭklučaje publičnyja pravierki vahi hramadzian na vulicach.
Z 10 maja pa 10 lipienia supracoŭniki sanitarnych słužbaŭ buduć vymiarać rost i vahu hramadzian u hramadskich miescach, raźličvać indeks masy cieła i, u vypadku pieravyšeńnia normy, nakiroŭvać ludziej u miedycynskija centry dla kansultacyj z dyjetołahami.
Meta kampanii — achapić 10 miljonaŭ čałaviek va ŭsich 81 pravincyi krainy, piša Turkish Minute.
Pavodle danych Suśvietnaj arhanizacyi achovy zdaroŭja, na 2023 hod tracina darosłych u Turcyi pakutuje ad atłuścieńnia.
Ekśpierty źviazvajuć rost atłuścieńnia nie tolki z ładam žyćcia, ale i z paharšeńniem ekanamičnaj situacyi ŭ krainie, jakaja abmiažoŭvaje dostup da zdarovaha charčavańnia.
Inicyjatyva vyklikała surjoznuju krytyku ŭ sacyjalnych sietkach. Karystalniki vykazvajuć zaniepakojenaść mahčymym publičnym prynižeńniem i parušeńniem pryvatnaści. Niekatoryja žartujuć, što ŭłady mohuć kanfiskoŭvać ježu ŭ ludziej na vulicach, inšyja nazyvajuć kampaniju «palavańniem na žyvaty».
«Ujavicie, što vy idziacie pa vulicy, jany spyniajuć vas i kažuć: «Hej, toŭsty, idzi ŭ centr», i kanfiskujuć abaranak u vašaj ruce», — pažartavaŭ adzin karystalnik.
Ministerstva achovy zdaroŭja Turcyi pakul nie ŭdakładniła, jak budzie zabiaśpiečvacca dobraachvotnaść udziełu ŭ pravierkach i jak budzie abaraniacca pryvatnaść hramadzian.