Tramp moža ŭvieści sankcyi suprać Maskvy abo vyjści ź pieramoŭ pa Ukrainie — WSJ
Prezident ZŠA razhladaje mahčymaść uviadzieńnia sankcyj suprać Rasii na hetym tydni, bo ŭsio bolš niezadavoleny rasijskimi atakami na Ukrainu, piša Wall Street Journal sa spasyłkaj na krynicy.
Fota: Joe Raedle / Getty Images
Pavodle słoŭ adnaho z surazmoŭcaŭ vydańnia, abmiežavańni, kali jany buduć uviedzienyja, nie buduć uklučać novyja bankaŭskija sankcyi, adnak abmiarkoŭvajucca inšyja varyjanty cisku na Uładzimira Pucina, kab prymusić jaho pajści na sastupki za stałom pieramovaŭ, uklučajučy zhodu na 30-dzionnaje spynieńnie ahniu, jakoje Rasija paśladoŭna adchilaje.
U niadzielu Tramp skazaŭ, što razhladaje mahčymaść uviadzieńnia sankcyj paśla masiravanaha ŭdaru pa Ukrainie minułymi vychadnymi. Paźniej jon znoŭ rezka raskrytykavaŭ Pucina, zajaviŭšy, što, na jaho dumku, toj «zusim zvarjacieŭ».
WSJ piša sa spasyłkaj na svaje krynicy, što Tramp stamiŭsia ad sprob mirnaha ŭrehulavańnia i razhladaje mahčymaść admovicca ad ich, kali jaho namahańni nie spracujuć. Pry hetym pakul nie jasna, što adbudziecca, kali ZŠA vyjduć ź pieramoŭnaha pracesu, i ci budzie Tramp praciahvać vajennuju padtrymku Kijevu, piša vydańnie.
«Prezident Tramp jasna daŭ zrazumieć, što choča bačyć mirnaje pahadnieńnie, dasiahnutaje šlacham pieramovaŭ», — havorycca ŭ zajavie pres-sakratarki Biełaha doma Kerałajn Livit dla WSJ.
Pra mahčymy vychad Vašynhtona ź pieramoŭ taksama pisała i New York Times, adnak krynicy vydańnia adznačali, što Tramp daŭ zrazumieć jeŭrapiejskim lidaram, što nie maje namieru ŭzmacniać sankcyjny cisk na Maskvu.