U Litvie vyśvietlili, što dapamohu, pryznačanuju biežancam z Ukrainy, atrymlivali i ludzi ź inšych krain. Siarod ich jość i biełarusy

U Litvie vyśvietliłasia, što dapamoha, pryznačanaja biežancam z Ukrainy, častkova traplała i da hramadzian Biełarusi, Rasii dy inšych krain. Z-za hetaha Litvie daviadziecca viarnuć bolš za miljon jeŭra ŭ biudžet Jeŭrasajuza. Ministerstva sacyjalnaj abarony i pracy ŭžo pačało ŭnutrany aŭdyt, a kiraŭnicu ahienctva Jeŭrapiejskaha sacyjalnaha fondu (ESFA), jakoje kuryravała prajekt, zvolnili, piša LRT.

Evakuacyja mirnych žycharoŭ z ukrainskaha Irpienia, 9 sakavika 2022 h. Fota: AR / Vadzim Hirda

Hety prajekt byŭ nakiravany na padtrymku ŭkraincaŭ, jakija ratavalisia ad vajny, i ŭklučaŭ dapamohu z charčavańniem, miedykamientami, jurydyčnymi kansultacyjami, vyvučeńniem litoŭskaj movy i pracoŭnaj intehracyjaj. Ahułam na 2022—2023 hady było vydzielena amal 17 miljonaŭ jeŭra.

Adnak akazałasia, što ŭ vyniku pad hety prajekt trapili i ludzi z 43 inšych krain, u tym liku z Rasii, Biełarusi, Kazachstana, Tadžykistana i padobnych krain, jakija mieli dazvoły na žycharstva ŭ Litvie. Niekatoryja ź ich naviedvali moŭnyja kursy i atrymlivali dapamohu ŭ pracaŭładkavańni.

Dziaržaŭnaja słužba kantrolu vyjaviła, što 813 čałaviek nie mieli prava atrymlivać hetuju dapamohu, bo nie byli ŭkraincami. Z-za hetaha Jeŭrakamisija admoviłasia finansavać hetyja vydatki. U Siejmie ličać, što ESFA dapuściła chałatnaść i niapravilna traktavała praviły.

Ahienctva, adnak, śćviardžaje, što na toj momant praviły dazvalali dapamahać usim sacyjalna ŭraźlivym asobam, nie tolki ŭkraincam, i što faktyčnaja kolkaść «nieadpaviednych» udzielnikaŭ była mienšaja — 484. Ale niezaležna ad hetaha srodki ŭsio adno pryjdziecca viarnuć.

Ministerstva pryznaje, što hetaja situacyja nieprymalnaja, i abiacaje zrabić usio, kab takoje nie paŭtaryłasia. U im pačaty ŭnutrany aŭdyt, kab vyśvietlić usie akaličnaści incydentu.

Kamientary da artykuła